Россия президенти Владимир Путин ва АҚШ президенти Жо Байденнинг учрашуви 16 июнь куни Швейцариянинг Женева шаҳрида бўлиб ўтади. Бу ҳақда Кремль веб-сайтига таяниб, «РБК» хабар берди.
Фото: «ТАСС»
Кремль қайд этишича, томонлар ўзаро муносабатларнинг ҳолати ва истиқболлари, стратегик барқарорлик ва халқаро кун тартибидаги долзарб масалаларни, шу жумладан, «коронавирус пандемиясига қарши кураш ва минтақавий можароларни ҳал қилишда ўзаро алоқаларни» муҳокама қилади.
AP хабарига кўра, Вашингтон ҳам учрашув 16 июнь куни бўлиб ўтишини тасдиқлади. Оқ уй матбуот котиби Жен Псакининг айтишича, Путин ва Байден «барча долзарб масалаларни муҳокама қилади».
Псаки АҚШ Россия билан муносабатларда «олдиндан кўра билиш ва барқарорликни» тиклашга интилаётганини қўшимча қилди.
13 апрель куни АҚШ президенти Жо Байден россиялик ҳамкасби билан учинчи давлат ҳудудида учрашиш истаги борлигини айтган эди. Кремль саммитнинг Евроиттифоқ давлатларидан бирида бўлиб ўтиши мумкинлигини маълум қилди. 4 май куни Байден учрашувнинг июнь ойида бўлиб ўтишини «умид билан кутаётгани»ни айтди. Россия президентининг ёрдамчиси Юрий Ушаков Путин ва Байденнинг учрашуви июнь ойида бўлиб ўтиши мумкинлигини, лекин аниқ саналар ҳали белгиланмаганини маълум қилди.
Бу АҚШ Президенти этиб сайланганидан бери Байденнинг Путин билан биринчи учрашуви бўлади. Охирги марта сиёсатчилар 2011 йилда Москвада учрашган: ўшанда Путин бош вазир, Байден вице-президент эди.
Путиннинг АҚШ собиқ президенти Дональд Трамп билан икки томонлама учрашуви бир марта — 2018 йилда Финландия пойтахти Хелсинкида бўлиб ўтган.
