Ryanair рейсининг Минскка мажбурий қўндирилишидан сўнг қайси давлатлар ва авиакомпаниялар Беларусь ҳаво майдонини бойкот қилмоқда?

Афинадан Вильнюсга йўл олган Ирландиянинг Ryanair авиакомпаниясига тегишли самолётни Минскка мажбурий қўндириш билан боғлиқ воқеадан сўнг Европа мамлакатлари авиакомпанияларга Беларусь ҳаво ҳудудидан фойдаланишни тақиқлади. Кўплаб самолётлар аллақачон Беларусь ҳаво ҳудудини четлаб ўтишни бошлади, деб ёзади «РБК».

Европа Иттифоқи саммити

Европа Иттифоқи мамлакатлари раҳбарлари учрашувидан сўнг Беларусь авиакомпанияларининг Европа Иттифоқи бўйлаб парвозларини тақиқлаш тўғрисида сиёсий қарор қабул қилинди. Қарор тегишли вазирларни ўз ичига олган Европа Иттифоқи Кенгаши томонидан тасдиқланиши керак. Шунингдек, мамлакатлар раҳбарлари Европа авиакомпанияларига Беларусь ҳудуди бўйлаб парвоз қилмасликни тавсия қилди.

Буюк Британия

Буюк Британия транспорт вазири Грант Шэппс Twitter’да мамлакат Беларусга тегишли Belavia авиакомпаниясининг Буюк Британияга парвозлари учун лицензияни тўхтатгани ҳақида эълон қилди. Шунингдек, Британия ҳукумати авиакомпаниялардан Беларусь ҳаво ҳудудидан фойдаланмасликни талаб қилди.

Литва

Литва транспорт вазири Мариус Скуодиснинг айтишича, 25 май тунидан бошлаб мамлакатга келган ёки у ердан жўнаётган барча самолётлар Беларусь ҳаво ҳудудига кирмаслиги лозим.

Франция

Хавфсизлик нуқтайи-назаридан Франция расмийлари ўзларининг авиакомпанияларига Беларусь устидан учиб ўтмасликни маслаҳат берди. Транспорт вазирлиги ҳузуридаги давлат котиби Жан-Батист Жеббарининг сўзларига кўра, Belavia парвозларига рухсат ҳам тўхтатилган. Air France компанияси Беларусь ҳаво ҳудудида парвозларни тўхтатди. «Йўналишда бўлган самолётлар учун парвоз режаси ўзгартирилади», — деди авиакомпания.

Польша

Польша Ташқи ишлар вазирлиги Беларусь устидан ўтишни тақиқлаш тўғрисида мурожаат қилди. Асосий авиакомпания LOT Беларусь ҳаво ҳудудидан фойдаланмасликка қарор қилди.

Украина

Миллий хавфсизлик ва мудофаа кенгаши йиғилиши пайтида Украина президенти Владимир Зеленский ҳукуматга Украина ва Беларусь ўртасида тўғридан-тўғри парвозларни тўхтатиш тўғрисидаги қарорни ишлаб чиқиш, шунингдек, Беларусь ҳаво майдони орқали Украинага парвозларни ёпиш тўғрисида кўрсатма берди. Мамлакатлар ўртасидаги ҳаво қатнови 26 май тунидан бошлаб тўхтатилади, деди Украина бош вазири Денис Шмигал.

Швеция

Швеция транспорт маъмурияти маҳаллий авиакомпанияларга вазият барқарорлашгунча Беларусь ҳаво ҳудудида парвозларни тўхтатишни тавсия этишга қарор қилди. Бу ҳақда 24 май куни департамент томонидан эълон қилинган баёнотда айтилган. Шундан сўнг Скандинавиянинг SAS авиакомпанияси ўз самолётлари Беларусь ҳаво ҳудудига кирмаслигини эълон қилди.

Нидерландия

Нидерландия бош вазири Марк Рютте Минскдаги воқеадан кейин KLM миллий авиаташувчиси Беларусь ҳаво ҳудуди орқали парвоз қилмаслиги кераклигини айтди. Кейинчалик KLM Беларусга парвозларни тўхтатиш тўғрисидаги қарорни эълон қилди.

Бельгия

Бельгия бош вазири Александр де Кроо ўзининг Twitter’ида Европа Иттифоқи Беларусга қарши янги санкцияларни, шу жумладан Belavia самолётларининг Европа Иттифоқи мамлакатлари аэропортларига қўнишини тақиқлашни муҳокама қилиши лозимлигини айтди.

Германия

Германия канцлери Ангела Меркель Беларусга қарши қўшимча санкциялар киритди. У бошқа масалалар қатори Belavia авиакомпаниясининг парвозларига тақиқ қўйилишини ҳам истисно қилмади. Меркелнинг нутқидан кўп ўтмай, Германиянинг Lufthansa авиакомпанияси Минскка парвозларни тўхтатиш ва Беларусь ҳаво ҳудудига киришни рад этиш тўғрисида қарор қабул қилганини эълон қилди.

Финляндия

24-куни Брюсселда бўлиб ўтган Европа Иттифоқи давлатлари раҳбарларининг саммитига келган Финляндия ҳукумати раҳбари Санна Марин ҳам Фуқаро авиацияси халқаро ташкилоти томонидан олиб борилган текширувлар охирига қадар Беларусь ҳаво ҳудудидан фойдаланишни тақиқлаш тўғрисида эълон қилди. Финляндиянинг Finnair давлат авиакомпанияси 25 май куни Беларусь ҳаво ҳудудини четлаб ўтишни режалаштираётганини маълум қилди. Уларнинг таъкидлашича, бу парвоз кўп вақтни олади.

Авиакомпаниялар

Латвиянинг AirBaltic компанияси ўзининг самолётлари учун Беларусь ҳаво ҳудудидан фойдаланишни бекор қилгани ҳақида эълон қилган биринчи компания бўлди. Austrian Airlines авиакомпаниясининг самолёти 24 май куни Венадан Москвага Беларусь орқали эмас, балки Украина орқали учиб келди. Компания вазиятнинг ривожланиши кутилаётганини айтди.

Венгриянинг WizzAir авиакомпанияси ўз самолётлари Беларусь ҳаво ҳудудига кирмаслигини маълум қилди.

Кипрда рўйхатдан ўтган Avia Solutions компанияси Литвадаги самолётлари Беларусь ҳудуди бўйлаб учиб ўтмаслигини ваъда қилди.

Россиянинг Utair авиакомпанияси 23 май куни Москвадан Калининградга Беларусни четлаб парвоз қилди. Кейинчалик компания буни «ёқилғини тежаш» билан изоҳлади, уларнинг сўзларига кўра, қайтиш рейси Беларусь ҳудуди бўйлаб амалга оширилган.