Шри-Ланкадаги Коломбо портидан унча узоқ бўлмаган ҳудудда 25 тонна азот кислотаси ортилган MV X-Press Pearl контейнерлар ташувчи кемада портлаш содир бўлди. Портлаш кемада 20 май куни юзага келган ёнғин ҳарбий авиация ва ҳарбий денгизчилар томонидан ўчирилаётган вақтда кузатилган, деб ёзмоқда Reuters.
Маҳаллий ОАВ портлашдан кейин камида саккизта контейнер денгизга қулаб тушганини хабар қилган.
«Шри-Ланкага ёнғинни бартараф қилиш учун Нидерландиядан махсус рейсда жуда муҳим қурилма олиб келиниши кутилмоқда», — дея вазият юзасидан изоҳ берган Шри-Ланка кемасозлик вазири Рохита Абейгунавардена.
Май бошида Бангладешда йўловчи ташувчи қайиқнинг юк кемаси билан тўқнашуви йўловчиларнинг ўлимига сабаб бўлганди. Апрель ойида эса БАА қирғоқларида Исроил юк кемасига ҳужум уюштирилгани, мазкур ҳолатдан кейин мамлакат ҳарбий денгиз кучлари шай ҳолатга келтирилгани хабар қилинганди.
Шунингдек, 21 апрель куни Индонезияда бортида 53 киши бўлган сувости кемаси бедарак йўқолган, орадан бир неча кун ўтгач, Индонезия ҳарбий денгиз кучлари сувости кемасидаги буюмлар топилгани, 53 нафар экипаж аъзосининг ҳаммаси ҳалок бўлганини маълум қилган. Сувости кемаси уч қисмга бўлиниб кетган ҳолда топилган.
Изоҳ (0)