Islandiya poytaxti Reykyavikda 20-mayga o‘tar kechasi Rossiya tashqi ishlar vaziri Sergey Lavrov va AQSh davlat kotibi Entoni Blinken birinchi marta yuzma-yuz ko‘rishdi. Uchrashuv Arktika kengashining vazirlar sessiyasi doirasida bo‘lib o‘tdi, deb yozmoqda Meduza.
Uchrashuv boshida koronavirusga qarshi choralar tufayli an’anaviy qo‘l siqish o‘rniga Lavrov va Blinken tirsak urishtirib ko‘rishdi. “Xarpa” konsert zalida ularning muzokaralari qariyb ikki soat davom etdi.
Blinken Lavrovga nima dedi?
AQSh davlat departamenti vakili Ned Pray ma’lum qilishicha, muzokaralar yakunida Blinken “Rossiyaning AQSh yoki uning ittifoqchilariga zarar yetkazadigan harakatlariga javoban Amerika fuqarolarini va davlat manfaatlarini qat’iy himoya qilish to‘g‘risida prezident Baydenning qarorini” yana bir bor qayd etib o‘tdi.
Blinken, shuningdek, Rossiya amerikalik Pol Uilan va Trevor Ridni ozod qilishi kerakligini “ochiqchasiga bildirib o‘tdi”.
“Davlat kotibi Blinken Rossiya armiyasining Ukrainada va uning yaqinida joylashtirilishi, “Amerika ovozi” va “Ozod Yevropa/Ozodlik radiosi”ga qarshi harakatlari, shuningdek, Aleksey Navalniyning sog‘lig‘i va muxolifat tashkilotlariga qarshi repressiyalari to‘g‘risida chuqur xavotirimizni bildirdi”, — dedi Prays
Uning qo‘shimcha qilishicha, ikki tomon Suriyadagi vaziyat, Armaniston va Ozarbayjon o‘rtasidagi ziddiyat hamda Eron va KXDR yadroviy dasturlarini tiyish masalalarini ham muhokama qilgan.
Bundan tashqari, muzokaralardan oldin Blinken jurnalistlarga Rossiya prezidenti Vladimir Putin va AQSh prezidenti Jo Baydenning uchrashuvi ehtimol yaqin haftalarda bo‘lib o‘tishi mumkinligini tasdiqlagan.
Lavrov Blinkenga nima dedi?
Qayd etilishicha, Lavrov Blinken bilan suhbatni “konstruktiv” deb baholadi. “Avvalgi yillarda Moskva va Vashington o‘rtasidagi munosabatlarda vujudga kelgan nosog‘lom vaziyatni bartaraf etish zarurligi bo‘yicha tushuncha bor. Ko‘plab “uyilib qolgan narsalar” mavjud. Ularni yoyib tashlash oson emas, men Entoni Blinken va uning jamoasi bunga qat’iy bel bog‘laganini his qildim. Bu masala bizni ham befarq qoldirmaydi”, — dedi Rossiya TIV vakili Lavrov.
Shu bilan birga, tashqi ishlar vaziri AQSh Rossiyaning “Qo‘shma Shtatlardagi diplomatik mulklarini reyderlik bilan tortib olish to‘g‘risidagi qarorlarini qayta ko‘rib chiqmaganidan, aksincha, 2017-yilda Rossiyaga qarshi, aksildiplomatik yangi qarorlar” qabul qilganidan shikoyat qildi.
Uchrashuvdan so‘ng diplomat Blinken bilan yana bir qator “mintaqaviy mojarolar”ni muhokama qilganini aytdi va muzokaralarni “juda foydali suhbat” sifatida ta’rifladi.
Lavrov, shuningdek, Putin va Bayden “ikki tomonlama munosabatlarda shubhasiz nosog‘lom vaziyatni tuzatish bo‘yicha umumiy sa’y-harakatlarning navbatdagi qadamlarini belgilashiga” umid bildirdi.
Izoh (0)