AQSh prezidenti Jo Bayden rossiyalik hamkasbi Vladimir Putin bilan iyun oyida Yevropada uchrashishga “umid qilmoqda va buni kutmoqda”. Bu haqda u Oq uyda bo‘lib o‘tgan brifing chog‘ida aytib o‘tdi, deb yozadi “RBK”.

Foto: Reuters

Jurnalistlardan biri prezidentdan iyun oyida Yevropaga safari chog‘ida Putin bilan uchrashish kutilyaptimi deb so‘radi. “Ha, umid qilaman va buni kutmoqdaman”, — dedi Bayden.

Iyun oyining birinchi yarmida Amerika prezidenti davlat rahbari sifatida chet elga birinchi safarini rejalashtirmoqda. Avval u Buyuk Britaniyaga, keyin Belgiyaga boradi.

AQSh davlat kotibi Entoni Blinken Putin va Baydenning yuzma-yuz  uchrashuvi ikkala mamlakat uchun ham foydali bo‘lishini aytdi.Uning so‘zlariga ko‘ra, Bayden haqiqatan ham “rostgo‘ylik va ochiqlikni muhim”, deb hisoblaydi va bu uchun eng yaxshi qadamlardan biri — shaxsan uchrashishdir.

Bundan avval Blinken uchrashuvda siyosatchilar ikki mamlakat o‘rtasidagi munosabatlarni barqarorlashtirish masalasini muhokama qilishi mumkinligini aytgan edi. Davlat kotibi, Vashington Rossiya bilan barqaror munosabatlarni o‘rnatishga intilayotganini aytgan, agar Moskva ham bunga qiziqish bildirayotgan bo‘lsa, albatta, deya qo‘shimcha qilgan. “O‘ylaymanki, prezident Bayden prezident Putin bilan uchrashganda bu haqda to‘g‘ridan to‘g‘ri gaplashish imkoniyatiga ega bo‘ladi”, — degan Blinken.

Baydenning milliy xavfsizlik bo‘yicha maslahatchisi Jeyk Sallivan muzokaralarning alohida mavzusi Ukrainadagi vaziyat, xususan, Donbassdagi qurolli mojaroning keskinlashuvi bo‘lishini aytgan.

Aprel oyi o‘rtalarida telefon orqali suhbat chog‘ida Bayden Putinga yaqin oylarda neytral hudud sifatida “uchinchi mamlakatda” uchrashishni taklif qildi. Keyinchalik Oq uy vakili Jen Psaki uchrashuv yozda bo‘lishi mumkinligini aytdi.

Rossiya tashqi ishlar vaziri Sergey Lavrov Moskva Amerika prezidentining taklifiga ijobiy baho berayotganini aytdi. Rossiya prezidentining matbuot kotibi Dmitriy Peskovning ta’kidlashicha AQSh uchrashuvni Yevropa mamlakatlaridan birida o‘tkazishni taklif qilgan.

Rossiya prezidentining yordamchisi Yuriy Ushakov Putin va Bayden sammiti iyun oyida o‘tkazilishi mumkinligini aytdi. “Iyun oyi tanlandi, hatto aniq sanalar ham belgilangan”, — dedi u, ammo aniq sanalarni oshkor qilmadi.