АҚШ ҳарбий аэродромлари дуч келаётган муҳим муаммолардан бири ёввойи ҳайвонлар, айниқса парвозлар хавфсизлигига таҳдид солувчи қушлар ҳисобланади. Самолётларнинг двигателлари, олд ойналари ва бошқарув юзаларига зарар етказувчи бундай тўқнашувлар хавфли оқибатларга олиб келиши мумкин. Бундай ҳолатларни синовдан ўтказиш учун ўз вақтида АҚШда “товуқ қуроли” ҳам яратилган. Бу қурилма қушлар жасадини ҳаво босими ёрдамида самолёт корпусига отиб, зарба кучини ўлчаган ва таҳлил қилган.

Бироқ ҳаводаги хавфлар билан бир қаторда, ерда ҳаракатланувчи жонзотлар — қуёнлардан тортиб кийикларга қадар турли ҳайвонлар ҳам муаммо туғдирмоқда. Улар аэродром инфратузилмасини ишдан чиқариб, учиш-қўниш йўлакларида ин қуради, ер кавлайди ва хавфсизликка жиддий зарар етказади. Бунга қарши курашиш учун дронлар, овчи қушлар, итлардан тортиб, қўрқитувчи ёруғлик мосламалари ва шовқинли қурилмалар каби турли воситалар қўлланилади.
Бугунги кунда АҚШ биолог олимлари ҳамда Ёввойи табиатни ўрганиш маркази “робот-бўрилар” ишлаб чиқмоқда. Улар ёввойи ҳайвонларни қўрқитиш ва ҳайдаш учун мўлжалланган. Дастлаб бундай роботлар Бостон Дйнамиcс томонидан ишлаб чиқарилган, кейинчалик эса Траххас Х-Махх русумидаги тез ҳаракатланувчи радио бошқарувли автомобиллар асосидаги, устига бўри манекенлари ўрнатилган моделларга алмаштирилган. Бундай роботнинг нархи тахминан 3 000 АҚШ долларини ташкил этади.

“Робот-бўрилар” АҚШнинг бир қатор ҳарбий аэродромларида, жумладан Пенсакола, Форт Кембелл ва Уайтинг Филд базаларида синовдан ўтказилди. Ташқи кўриниши содда бўлишига қарамай, келажакда улар мустақил ҳаракатлана оладиган, ўз-ўзини қувватлайдиган, ҳайвонлар жойлашувини аниқлайдиган ва уларни аэропорт ҳудудидан ҳайдашга мослаштирилган қўриқчиларга айланиши режалаштирилган.
Изоҳ (0)