Буюк Британия бош вазири Беларусни Роман Протасевични зудлик билан озод қилишга чақирди

Буюк Британия бош вазири Борис Жонсон Беларусь раҳбариятини Минскдаги Ryanair самолётининг фавқулодда қўниши билан боғлиқ ҳодиса оқибатлари тўғрисида огоҳлантирди деб ёзади «ТАСС».

Twitter’даги саҳифасига жойланган хабарида Жонсон, шунингдек, Минскда ҳибсга олинган Nexta Telegram канали асосчиси Роман Протасевични зудлик билан озод қилишга чақирди.

«Роман Протасевич иштирокидаги видео чуқур ташвишга солмоқда», — деб ёзган Жонсон. — «Журналист ва сўз эркинлигига чинакам ишонадиган инсон сифатида мен уни зудлик билан озод қилишга чақираман. Беларуснинг ҳаракатлари маълум бир оқибатларга олиб келади».

24 май куни Буюк Британия ташқи ишлар вазири Доминик Рааб Британия ҳукумати чет эллик ҳамкорлар билан Ryanair воқеаси ва Протасевич ҳибсга олинганидан кейин Беларусга қарши қўлланилиши мумкин бўлган кенг кўламли чораларни муҳокама қилаётганини айтди.

Буюк Британия Беларусга тегишли Belavia авиакомпаниясининг Буюк Британияга парвозларни амалга ошириш учун лицензиясини тўхтатиб қўйди. Бундан ташқари, қиролликда рўйхатдан ўтган авиакомпаниялар Беларусь ҳаво ҳудудини четлаб ўтиш бўйича расмийлардан кўрсатма олди.

Эслатиб ўтамиз, 23 май куни Беларусь ҳукумати Ryanair авиакомпаниясининг Афинадан Вильнюсга учаётган самолётини шошилинч равишда Минскка қўнишга мажбур қилди. Қўнишдан сўнг рейснинг икки йўловчиси — Роман Протасевич ва София Сапега ҳибсга олинди.

Беларусь расмийларининг маълум қилишича, Ryanair рейси бортида бомба борлиги ҳақида Минск аэропортига Фаластиннинг ҲАМАС ҳаракати номидан юборилган хабар келиб тушган. ҲАМАС ўзининг бу хабарга алоқаси йўқлигини айтди.

Ryanair самолётининг фавқулодда қўндирилишидан сўнг Европа мамлакатлари Беларусдан парвозларни қабул қилишни рад эта бошлади, Европа авиакомпаниялари эса Беларусь ҳаво ҳудудини кесиб ўтишдан бош тортмоқда.

Беларусда Протасевичга қарши бир нечта жиноий ишлар, жумладан, оммавий тартибсизликларни ташкил қилиш бўйича иш қўзғатилган. 24 май куни Беларуснинг ҳукуматга яқин Telegram канали жойлаштирган видеода Протасевич айбига иқрор бўлганини айтган.

2020 йил ноябрида Роман Протасевич Беларусда террорчилик фаолиятига алоқадор жисмоний шахслар рўйхатига киритилган эди.