Қирғизистон ва Тожикистон икки давлат чегарасида ҳибсга олинган фуқароларни алмашди

Қирғизистон ва Тожикистон икки давлат чегарасида ҳибсга олинган фуқароларни алмашди. Бу ҳақда Қирғизистон давлат чегара хизмати матбуот марказига таяниб, «РИА Новости» хабар берди.

Қайд этилишича, аввалроқ уч нафар Тожикистон фуқароси транзит йўлда ҳаракатланиш қоидаларини бузгани учун Қирғизистон ҳуқуқ-тартибот идоралари ходимлари томонидан ҳибсга олинган.

Шу билан бирга, 30-40 га яқин тожикистонликлар Ворух анклави орқали Тамдик қишлоғидан Оқ-Сой қишлоғига кетаётган уч нафар Қирғизистон фуқаросини йўлда тутиб, ўзбошимчалик билан ҳибсга олган.

«Республикаларнинг Боткен ва Сўғд вилоятлари раҳбарлари ўртасида олиб борилган музокараларда ҳибсга олинганларни алмашиш тўғрисида қарор қабул қилинди. 17 май куни маҳаллий вақт билан соат 13:30 да икки давлатнинг ҳибсга олинган фуқаролари томонларга топширилди», — дейилади хабарда.

Кейинчалик тожикистонликлар томонидан ҳибсга олинган Қирғизистоннинг уч нафар фуқароси калтаклангани маълум бўлди. Матбуот марказининг аниқлик киритишича, Қирғизистон фуқаролари Оқ-Сой қишлоғи орқали алмашинув жойига ўтаётган Тожикистон чегара аскарларининг машинасига тош отган.

«Айни пайтда чегара вакиллари, шунингдек, томонларнинг Ички ишлар бошқармаси раҳбарлари ўртасида учрашув бўлиб ўтмоқда», — дейилади Қирғизистон чегара хизмати ахборотида.

Эслатиб ўтамиз, апрель ойи охирида Қирғизистон ва Тожикистоннинг чегараолди вилоятлари аҳолиси ўртасидаги зиддият икки мамлакат ҳарбийларининг қуролли тўқнашувига айланиб кетди. Қирғиз-тожик чегарасидаги низоларда Қирғизистоннинг 36 фуқароси ҳалок бўлди, 200 га яқин киши жароҳат олди. Тожикистон эса 19 киши ҳалок бўлгани, 87 киши жабрлангани ҳақида хабар берди. Можарода 300 дан ортиқ уйлар ва инфратузилма объектлари вайрон қилинган, айримлари ёниб кетган. 29 апрель оқшомида томонлар низони тўхтатиш ва чегарадан ҳарбий кучларни олиб кетиш тўғрисида келишиб олди, аммо эртаси куни яна отишма бошланди. 30 апрель куни тушдан кейин навбатдаги сулҳга эришилди. 3 май куни Қирғизистон ва Тожикистон ўз ҳарбий кучларини чегара чизиғидан олиб чиқишни якунлади.