Май ойининг бошида Microsoft асосчиси Билл Гейтс ва унинг турмуш ўртоғи Мелинда ажрашаётгани ҳақида маълум қилгач, Мелинда қиймати уч миллиард доллардан ортиқ акциялар эгасига айланди, деб ёзмоқда Bloomberg.
Мелиндага ушбу акцияларни Билл Гейтс томонидан унинг активларини бошқариш учун ташкил этилган Cascade Investment компанияси берди. Cascade Investment Гейтснинг турли компаниялардаги умумий қиймати 52 миллиард доллар бўлган улушларини назорат қилади.
Мелинда Гейтс Cascade Investment компаниясидан Американинг қишлоқ хўжалиги ускуналарини ишлаб чиқарувчи John Deere, Мексиканинг ичимликлар ишлаб чиқарувчи Coca-Cola Femsa, Канада Миллий темир йўллари каби компанияларининг акцияларини олди.
Маълумот учун, Билл ва Мелинда Гейтс 3 май куни ажрашаётгани ҳақида маълум қилди. Лекин улар ўртасида мулкнинг қандай тақсимланиши номаълумлигича қолди. Мелинда Гейтс турмуш ўртоғи билан ажрашган тақдирда алимент талаб қилмаслигини айтган.
Ажрашиш ҳақида эълон қилинишидан аввал Билл Гейтснинг бойлигини Forbes 130 миллиард долларга (айни вақтда 128,3 миллиард доллар), Bloomberg эса 146 миллиард долларга (айни вақтда 144 миллиард доллар) баҳолаган эди.
Эслатиб ўтамиз, 2019 йилда Amazon асосчиси Жефф Безос ва унинг рафиқаси Маккензининг ажрашуви тарихда энг қимматга баҳоланган ажрашиш бўлган эди. Маккензи собиқ турмуш ўртоғидан Amazon компаниясининг 35 миллиард долларлик акцияларини олиб, бадавлат одамлар ўз бойликларининг катта қисмини хайрияга йўналтирувчи «Ҳадя қилиш қасамёди» ташаббусига қўшилган.
Изоҳ (0)