Россиянинг Москва шаҳридаги хостеллардан бирида ўтказилган рейдларда 300 нафар мигрант қўлга олинди. Бу ҳақда “Росгвардия” пойтахт бош бошқармаси хабар берди.
Хостелда яшовчи 400 нафар хорижликнинг миграция карталари, паспортлари ва ишчи патентлари текширилган. Натижада 300 киши миграция қонунчилигини бузганликда айланиб, қўлга олинган. Улар қўшимча тергов ўтказиш учун полиция бўлимига олиб кетилган.
Июль ойида ҳам Москвада муҳожирларга қарши рейдлар бўлиб ўтганди. Ўшанда шаҳардаги хостеллар ва ибодатхоналар текширилган. Ушбу объектлардаги 500 дан ортиқ муҳожир текширув учун полицияга олиб кетилган. Россияга кириш ва мамлакатда бўлиш қоидаларини бузган 30 дан ортиқ киши маъмурий жавобгарликка тортилган ва чиқариб юборилган. Бундан ташқари, федерал қидирувда бўлган бир нафар мигрант қўлга олинган эди.
Москвада 2024 йил 22 март куни Crocus City Hall концерт залида содир этилган теракт мигрантларга нисбатан текширув кучайишига сабаб бўлди. Россия ҳукумати бир неча Тожикистон фуқароларини теракт ташкилотчилари деб атади. Шундан сўнг бозорлар, масжидлар, ҳаммомлар ва кафеларда муҳожирларга қарши рейдлар ўтказилди. Россия Ташқи ишлар вазирлиги ҳаммомда мигрантларни калтаклаган хавфсизлик кучларини оқлаб чиқди. Вазирликка кўра, бу рейдда “режали текширув” ўтказилган ва “қонун ҳужжатларига мувофиқ” ҳаракат қилинган.
Россиядаги рейдда ўзбекистонликларга жисмоний куч ишлатилганди
8 июнь куни Москвада ўтказилган рейдда меҳнат фаолиятини олиб бораётган Ўзбекистон фуқароларига нисбатан ОМОН жисмоний куч қўллаганди. Муҳожирларга нисбатан шафқатсиз муносабат ортидан Ўзбекистон Ташқи ишлар вазирлиги Россияга нота юборганди. Унда ҳолатга изоҳ бериш, куч ишлатар ташкилот вакилларининг ҳаракатларига ҳуқуқий баҳо бериш сўралган.
Шундан сўнг Россия Ташқи ишлар вазирлиги вакили Мария Захарова нота диққат билан ўрганилишини айтганди. У ўзбекистонлик ҳамкорларнинг тегишли сўрови ваколатли органларга етказилганини билдирган. Олинган объектив маълумотлар белгиланган тартибда Тошкентга юборилиши таъкидланган. Бироқ расмий Тошкент мазкур ҳолат юзасидан оммага баёнот бермаган.
Изоҳ (0)