АҚШ давлат департаментининг собиқ ходими ҳамда 40-президент Роналд Рейганнинг СССР бўйича норасмий маслаҳатчиси бўлган америкалик ёзувчи Сузанна Масси Россия президенти Владимир Путиндан Россия фуқаролигини сўради. Бу ҳақда ёзувчи НТВ телеканалига берган интервьюсида айтиб ўтди, деб ёзади «РБК».
«Мен ҳаётимнинг кўп йилларини Қўшма Штатлар ва Россия халқи ўртасида дўстона муносабатлар ўрнатишга бағишладим. Бугун ўз фаолиятимни давом эттириш учун Россияда қолишим жуда муҳим. Агар президент Владимир Владимирович менга Россия фуқаролигини бериш имкониятини тақдим этса, бу мен учун шараф бўлади», — деди у.
Россия президенти матбуот котиби Дмитрий Песков ёзувчининг илтимосига изоҳ берар экан, фуқароликни олиш учун «маълум бюрократик жараёнлардан ўтиш лозим»лигини айтди.
Сузанна Масси 60 йилларнинг охирларида СССР ва Россия тарихини ўрганишни бошлаган, шундан сўнг у «Қақнус мамлакати» китобини ёзган. «ТАСС»га берган интервьюсида у сиёсий вазиятни эмас, балки рус халқини яхши билгани туфайли Рейганнинг норасмий маслаҳатчисига айланганини айтди.
1954—1990 йилларда Масси чор Россиясини ўрганган тарихчи Роберт Масси билан турмуш кечирди. 2019 йилда Роберт Масси 90 ёшида вафот этди.
Изоҳ (0)