Qirg‘iziston va Tojikiston ikki davlat chegarasida hibsga olingan fuqarolarni almashdi. Bu haqda Qirg‘iziston davlat chegara xizmati matbuot markaziga tayanib, “RIA Novosti” xabar berdi.
Qayd etilishicha, avvalroq uch nafar Tojikiston fuqarosi tranzit yo‘lda harakatlanish qoidalarini buzgani uchun Qirg‘iziston huquq-tartibot idoralari xodimlari tomonidan hibsga olingan.
Shu bilan birga, 30-40 ga yaqin tojikistonliklar Vorux anklavi orqali Tamdik qishlog‘idan Oq-Soy qishlog‘iga ketayotgan uch nafar Qirg‘iziston fuqarosini yo‘lda tutib, o‘zboshimchalik bilan hibsga olgan.
“Respublikalarning Botken va So‘g‘d viloyatlari rahbarlari o‘rtasida olib borilgan muzokaralarda hibsga olinganlarni almashish to‘g‘risida qaror qabul qilindi. 17-may kuni mahalliy vaqt bilan soat 13:30 da ikki davlatning hibsga olingan fuqarolari tomonlarga topshirildi”, — deyiladi xabarda.
Keyinchalik tojikistonliklar tomonidan hibsga olingan Qirg‘izistonning uch nafar fuqarosi kaltaklangani ma’lum bo‘ldi. Matbuot markazining aniqlik kiritishicha, Qirg‘iziston fuqarolari Oq-Soy qishlog‘i orqali almashinuv joyiga o‘tayotgan Tojikiston chegara askarlarining mashinasiga tosh otgan.
“Ayni paytda chegara vakillari, shuningdek, tomonlarning Ichki ishlar boshqarmasi rahbarlari o‘rtasida uchrashuv bo‘lib o‘tmoqda”, — deyiladi Qirg‘iziston chegara xizmati axborotida.
Eslatib o‘tamiz, aprel oyi oxirida Qirg‘iziston va Tojikistonning chegaraoldi viloyatlari aholisi o‘rtasidagi ziddiyat ikki mamlakat harbiylarining qurolli to‘qnashuviga aylanib ketdi. Qirg‘iz-tojik chegarasidagi nizolarda Qirg‘izistonning 36 fuqarosi halok bo‘ldi, 200 ga yaqin kishi jarohat oldi. Tojikiston esa 19 kishi halok bo‘lgani, 87 kishi jabrlangani haqida xabar berdi. Mojaroda 300 dan ortiq uylar va infratuzilma obyektlari vayron qilingan, ayrimlari yonib ketgan. 29-aprel oqshomida tomonlar nizoni to‘xtatish va chegaradan harbiy kuchlarni olib ketish to‘g‘risida kelishib oldi, ammo ertasi kuni yana otishma boshlandi. 30-aprel kuni tushdan keyin navbatdagi sulhga erishildi. 3-may kuni Qirg‘iziston va Tojikiston o‘z harbiy kuchlarini chegara chizig‘idan olib chiqishni yakunladi.
Izoh (0)