Жонс Ҳопкинс университети маълумотларига кўра, дунё бўйича COVID-19’ни юқтириб олганлар сони 163 112 264 кишига етди. Касалланганлар сони бўйича АҚШ (32,9 миллион), Ҳиндистон (24,9 миллион), Бразилия (15,6 миллион), Франция (5,9 миллион) ва Туркия (5,1 миллион) етакчилик қилмоқда. Бутун дунёда коронавирус оқибатидаги ўлимлар сони 3 380 353 тани ташкил қилмоқда.
Экспертлар иссиқ об-ҳавонинг COVID-19 тарқалишига таъсирини баҳолади. Ҳар бир вируснинг ўз учун «қулай ҳарорат» бўлади, иссиқ ва қуруқ ҳавонинг COVID-19 билан касалланиш даражасининг ўсишига таъсири ҳақида гапириш нотўғри, дея маълум қилди россиялик инфекционист шифокор, «Лидер-Медицина» тиббий маркази бош шифокори Евгений Тимаков.
Унинг фикрига кўра, вируснинг яшовчанлигига ҳавонинг намлиги таъсир қилади. «Агар ҳавонинг юқори ҳароратига юқори даражадаги намлик ҳамроҳлик қилса, бу хавфли бўлиши мумкин, чунки вирусли суспензияларнинг (қаттиқ жисм зарралари муаллақ юрган суюқлик ёки газ) ҳавода узоқ вақт бўлиши касалланиш даражасининг ўсишига имконият яратади», — деди вирусолог.
Юқори даражада инсоляция (қуёш нурларининг хонага тушиш даражаси) шароитида вирус фаоллиги пастроқ бўлади. Аммо у одамлар кўп бўлиб йиғилган вақтда тез тарқалади.
«Шиллиқ қаватнинг қуриб кетишига келсак, мегаполислар аҳолисининг катта қисмида шиллиқ қават шундоқ ҳам қуриб кетган, бу кўчада об-ҳавонинг қандайлигига боғлиқ эмас.. Ҳамма жойда кондиционерлар ишлайди, улар ҳавони қуритади, жамоат транспортида ҳам ҳаво доим қуруқ бўлади», — дея қўшиб қўйди Тимаков.
Вирусолог, Москва давлат университети профессори, биология фанлари доктори Алексей Аграновский маълум қилишича, COVID-19 касалланганлар томонидан йўталиб чиқарилган балғам зарралари орқали тарқатилади. Ҳарорат юқори бўлиб, намлик паст бўлганида вирус фаоллигини тезроқ йўқотади, балғам заррачалари эса қаттиқ юзаларда тезроқ қурийди. COVID-19 юқиши учун энг қулай шароитлар — одамларнинг ёпиқ, яхши шамоллатилмайдиган биноларда тўпланиши», — деб ҳисоблайди вирусолог.
Аграновскийнинг қайд этишича, жазирамада одамлар уйда кўп ўтирмайди ва кўпроқ вақтини тоза ҳавода ўтказади, бу эса вирус юқиши хавфини камайтиради.
Британия қироллик оиласи аъзоси, Елизавета II нинг амакиваччаси Кент шаҳзодаси Майклнинг рафиқаси — Кент маликаси Мария Кристина фон Рейбниц AstraZeneca вакцинаси билан коронавирусга қарши эмланганидан кейин, унда тромбоз аниқланди.76 ёшли фон Рейбниц 2021 йил бошида вакцина олган. Бироз вақтдан кейин унинг саломатлиги шифокорларда хавотир уйғота бошлаган, унда тромбоз аниқланган.
Коронавирусга қарши эмланиш ва тромблар ҳосил бўлиши ўртасидаги бевосита алоқа аниқланганича йўқ. Бир ойдан буён Кент маликаси уйда даволанмоқда.
Тайванда пандемия бошидан буён энг қатъий чекловлар жорий қилинди. Оролда 28 майгача кинотеатрлар ва кўнгилочар муассасалар ёпиқ бўлади. Бино ичида беш, очиқ ҳавода эса ўн киши бўлиб тўпланиш мумкин. Бундан ташқари, аҳоли очиқ ҳавода ҳам ниқоб тақиши, иложи борича уйдан ўқиши ва ишлаши керак.Шу пайтгача пандемиядан деярли зарар кўрмаган Тайванда касалланиш ҳолатларининг кескин кўпайиши кузатилмоқда. Сўнгги бир кунда 207 киши коронавирусни юқтириб олди ва умумий касалланганлар сони 1682 кишига етди. COVID-19 оқибатидаги ўлимлар эса 12 тани ташкил қилмоқда.
Шунингдек:- Эстонияда 17 майдан коронавирусга қарши оммавий эмлаш бошланди: 16 ёшдан ошган исталган шахс вакцина олиши мумкин. 50 ёшдан ошганларга AstraZeneca, 50 ёшга етмаганларга Pfizer, Модерн ава Janssen вакциналари юборилади.
- Буюк Британияда коронавирус пандемияси туфайли жорий қилинган чекловларни бекор қилишнинг учинчи босқичи бошланди. 17 майдан меҳмонхона ва ҳостеллар очилади; театр, концерт заллари, музей ва кинотеатрлар очилиши мумкин; томошабинлар иштирокидаги спорт тадбирларига рухсат берилади; паб, бар ва ресторанлар очиқ ҳавода ва масофа сақлаган ҳолатда мижозларга хизмат кўрсатиши мумкин; университет ва мактабларга қатнаб ўқишга рухсат берилади.
Изоҳ (0)