Ҳиндистонда ўтган бир кеча-кундузда 281 386 кишида COVID-19 аниқланди. Бу 21 апрелдан бери қайд этилган энг паст суткалик кўрсаткич.
Ҳиндистон Соғлиқни сақлаш вазирлигининг маълумотларига кўра, сўнгги 24 соатнинг ўзида мамлакатда 4106 киши коронавирусдан вафот этган.
Ҳиндистонда инфекция юқтирганларнинг умумий сони 24 965 463 кишига етган, улардан 274 390 нафари касаллик қурбонига айланган.
Мутахассисларнинг фикрига кўра, касаллик юқтирганлар ва вафот этганлар сони расмий маълумотларда қайд этилганидан анча кўп. Айни пайтда COVID-19 ташхиси билан 3 516 997 нафар бемор даволанмоқда.
Шу билан бирга, Ҳиндистонда ўтган куни 691 211 киши коронавирусга қарши эмланиб, вакцина олган фуқароларнинг умумий сони 182 926 460 кишига етган.
Шунингдек, Ҳиндистон Соғлиқни сақлаш вазирлиги коронавирус пандемиясининг иккинчи тўлқини таъсирига учраган ушбу мамлакатда вазият барқарорлашгани ҳақида маълум қилди.
Маълумот учун, Ҳиндистон коронавирус билан касалланганлар сони бўйича дунёда иккинчи ўринни эгаллаб турибди. Аввалроқ Ҳиндистоннинг Бихар штатида Ганга дарёсидан COVID-19 туфайли вафот этгани тахмин қилинаётган камида ўттиз кишининг жасади топилгани ҳақида хабар берилган. Маҳаллий аҳолининг таъкидлашича, қирғоқ бўйидаги қишлоқларда яшовчилар марҳумларнинг жасадларини дарёга ташлаб юбормоқда, чунки уларни куйдириш ва дафн гулханларини ёқиш қимматга тушади.
Ҳиндистон ҳукумати ўликларнинг сувга ноқонуний равишда ташланишининг олдини олиш мақсадида Ганга дарёсига тўрлар ўрнатган.
Мавзуга доир:
- Ҳиндистонда яна рекорд, мамлакатдаги вазият «коронавирус бўрони» деб таърифланди. Минглаб одамлар вафот этиб, дафн гулханлари кеча-ю кундуз ёнмоқда (фото)
- Ҳиндистонда COVID-19’га чалиниш бўйича яна жаҳон рекорди янгиланди. АҚШ коронавирусга қарши курашда Ҳиндистонга 100 млн долларлик ёрдам юборади
- ЖССТ Ҳиндистонда COVID-19 авж олишининг сабабини маълум қилди
Изоҳ (0)