Озарбайжон президенти Илҳом Алиев Боку тасарруфига ўтган Шуша шаҳрини расмий равишда мамлакатнинг маданий пойтахти, деб аташ бўйича фармонни имзолади. Бу ҳақда «РБК» хабар берди.

Фото: «пресидент.аз»

«Шуша шаҳри Озарбайжоннинг маданий пойтахти деб эълон қилинади», — дейилади фармонда. Унда «Шуша шаҳрининг тарихий қиёфасини ва аввалги шон-шуҳратини тиклаш, шунингдек, анъанавий мазмунли маданий ҳаётни янгилаш тўғрисида» қарор қабул қилингани айтилган.

Шаҳарни халқаро майдонда Озарбайжоннинг бой маданияти, меъморчилиги ва ёрқин марвариди сифатида тарғиб қилиш режалаштирилган.

Фармонга биноан шаҳарнинг тарихий ва маданий аҳамияти ҳамда «озарбайжон халқига хос маънавий қадрият» туфайли Шушага «алоҳида ғамхўрлик» билан муносабатда бўлиш лозим.

Алиев январь ойида Шуша Озарбайжоннинг маданий пойтахтига айланиши ҳақида айтган эди. Унинг сўзларига кўра, асосий вазифалардан бири бу шаҳардаги тарихий ёдгорликлар ва масжидларни қайта тиклашдир.

Маълумот учун, Тоғли Қорабоғдаги Шуша шаҳри 2020 йил ноябрида Озарбайжон назорати остига ўтди. Арманистон кучлари томонидан шаҳарнинг қўлдан берилиши кузда авж олган можаронинг сўнгги воқеаларидан бири бўлди. Шуша стратегик мавқега эга шаҳар бўлиб, Тоғли Қорабоғ пойтахти Степанакертдан 10 км жанубда жойлашган. Степанакертни Арманистон билан боғловчи йўл мазкур шаҳардан ўтади. 90 йилларнинг бошида кечган Қорабоғдаги биринчи уруш пайтида шаҳар жиддий зарар кўрган. Ҳозирги кунда Шуша аҳолиси 4 минг кишидан сал кўпроқ.

Шуша вайрон қилинганидан сўнг  дарҳол Москва воситачилигида Ереван ва Боку можарони тўхтатиш тўғрисида келишувга эришди. Унга мувофиқ Тоғли Қорабоғнинг муҳим қисми Озарбайжон ҳарбийлари назорати остига ўтди ва тинчлик шартномасига риоя этилишини назорат қилиш Россия тинчликпарвар кучларига топширилди.

Аввалроқ Туркия президенти Ражаб Тоййиб Эрдўғон Рамазондан кейин (май ойида) Тоғли Қорабоғдаги Шуша шаҳрига ташриф буюриш нияти борлигини маълум қилди. Таъкидланишича, Эрдўғон Шушага Озарбайжон президенти Илҳом Алиев билан бирга келиш ниятидалигини билдирган.