Amnesty International ташкилоти Навальнийни яна бир бор «виждон маҳбуси» деб тан олмоқчи

Amnesty International инсон ҳуқуқларини ҳимоя қилиш ташкилоти Россия мухолифати етакчиси Алексей Навальнийга «виждон маҳбуси» мақомини қайтариш ниятида. Бу ҳақда сиёсатчининг шериги Леонид Волков Канада жамоатчилик палатасининг ташқи алоқалар қўмитаси олдидаги чиқишида айтиб ўтди, деб ёзади Meduza.

Волковнинг сўзларига кўра, Amnesty тегишли пресс-релизни 12 май куни — «бунга Россиянинг дезинформация кампанияси қандай таъсир қилиши мумкинлигини текширгандан сўнг» эълон қилади.

Ташкилотнинг Россиядаги ваколатхонаси Волковнинг сўзларига изоҳ беришдан бош тортган.

Маълумот учун «виждон маҳбуси» атамаси 1960 йилларнинг бошида Amnesty International халқаро инсон ҳуқуқларини ҳимоя қилиш ташкилотининг асосчиси, британиялик адвокат ва инсон ҳуқуқлари ҳимоячиси Питер Бененсон томонидан киритилган. Бу атама ҳибсга олинган ёки озодликдан маҳрум қилинган шахсларнинг сиёсий, диний ёки илмий қарашларини тинч йўл билан ифода этишини англатади. Ўз навбатида зўравонлик билан шуғулланадиган ёки куч ишлатиш ва адоватни тарғиб қилувчилар «виждон маҳбуси» ҳисобланмайди.

2021 йил январда Алексей Навальний Берлиндан Москвага келган пайт ҳибсга олингандан сўнг, Amnesty International сиёсатчини «виждон маҳбуси» деб тан олиб, уни зудлик билан озод қилишни талаб қилган эди. Бир ой ўтгач, ташкилот ушбу мақомни бекор қилди, бунга сиёсатчининг 2000 йилларда берган муҳожирлар ҳақидаги баёнотлари сабаб бўлган бўлиши мумкин. Март ойида Amnesty Навальнийни қўллаб-қувватлаш учун янги баёнот чиқариб, унинг Покров шаҳридаги колонияда сақланишини қоралади.

29 март куни БМТнинг Алексей Навальнийнинг заҳарланиши бўйича махсус маърузачиси бўлган Анес Калламар Amnesty International ташкилотининг янги бош котиби этиб тайинланди.

Навальний 31 мартда очлик эълон қилганди. У мазкур қарорини соғлиғи ёмонлашганига қарамай ёнига фуқаролик тиббиёти тизимидаги шифокорлар киритилмаётганига норозилик дея изоҳлаган. Россия президенти Владимир Путиннинг матбуот хизмати Навальнийнинг очлик эълон қилишига изоҳ беришдан бош тортган.

21 апрелда Россияда «Навальнийга озодлик» номли норозилик намойишлари ўтказилди. Сиёсатчининг тарафдорлари Навальнийнинг шифокорлари унинг соғлиғи ёмонлашганини хабар қилганидан кейин мамлакатдаги одамларни кўчаларга чиқиб, норозилик намойишларини ўтказишга чорлади.

24 апрелда Алексей Навальний норозилик сифатида эълон қилган очлигини тўхтатди.