Ozarbayjon prezidenti Ilhom Aliyev Boku tasarrufiga o‘tgan Shusha shahrini rasmiy ravishda mamlakatning madaniy poytaxti, deb atash bo‘yicha farmonni imzoladi. Bu haqda “RBK” xabar berdi.
“Shusha shahri Ozarbayjonning madaniy poytaxti deb e’lon qilinadi”, — deyiladi farmonda. Unda “Shusha shahrining tarixiy qiyofasini va avvalgi shon-shuhratini tiklash, shuningdek, an’anaviy mazmunli madaniy hayotni yangilash to‘g‘risida” qaror qabul qilingani aytilgan.
Shaharni xalqaro maydonda Ozarbayjonning boy madaniyati, me’morchiligi va yorqin marvaridi sifatida targ‘ib qilish rejalashtirilgan.
Farmonga binoan shaharning tarixiy va madaniy ahamiyati hamda “ozarbayjon xalqiga xos ma’naviy qadriyat” tufayli Shushaga “alohida g‘amxo‘rlik” bilan munosabatda bo‘lish lozim.
Aliyev yanvar oyida Shusha Ozarbayjonning madaniy poytaxtiga aylanishi haqida aytgan edi. Uning so‘zlariga ko‘ra, asosiy vazifalardan biri bu shahardagi tarixiy yodgorliklar va masjidlarni qayta tiklashdir.
Ma’lumot uchun, Tog‘li Qorabog‘dagi Shusha shahri 2020-yil noyabrida Ozarbayjon nazorati ostiga o‘tdi. Armaniston kuchlari tomonidan shaharning qo‘ldan berilishi kuzda avj olgan mojaroning so‘nggi voqealaridan biri bo‘ldi. Shusha strategik mavqega ega shahar bo‘lib, Tog‘li Qorabog‘ poytaxti Stepanakertdan 10 km janubda joylashgan. Stepanakertni Armaniston bilan bog‘lovchi yo‘l mazkur shahardan o‘tadi. 90-yillarning boshida kechgan Qorabog‘dagi birinchi urush paytida shahar jiddiy zarar ko‘rgan. Hozirgi kunda Shusha aholisi 4 ming kishidan sal ko‘proq.
Shusha vayron qilinganidan so‘ng darhol Moskva vositachiligida Yerevan va Boku mojaroni to‘xtatish to‘g‘risida kelishuvga erishdi. Unga muvofiq Tog‘li Qorabog‘ning muhim qismi Ozarbayjon harbiylari nazorati ostiga o‘tdi va tinchlik shartnomasiga rioya etilishini nazorat qilish Rossiya tinchlikparvar kuchlariga topshirildi.
Avvalroq Turkiya prezidenti Rajab Toyyib Erdo‘g‘on Ramazondan keyin (may oyida) Tog‘li Qorabog‘dagi Shusha shahriga tashrif buyurish niyati borligini ma’lum qildi. Ta’kidlanishicha, Erdo‘g‘on Shushaga Ozarbayjon prezidenti Ilhom Aliyev bilan birga kelish niyatidaligini bildirgan.
Izoh (0)