Ҳиндистонда ўтган бир кеча-кундузда 414 188 кишида коронавирус аниқланди. Бу кунлик касалланиш сонининг ўсиши бўйича янги рекорд, деб ёзади «РБК» мамлакат ҳукумати сайтига таяниб.
Хабарга кўра, кун давомида 3 915 киши вафот этган ва ўлимлар сони бўйича ҳам суткалик рекорд янгиланган. Шу билан бирга, 313,5 минг киши касалликдан соғайган.
Аввалги куни Ҳиндистонда COVID-19’га чалиниш бўйича 412 мингдан ортиқ янги ҳолат қайд этилганди. Мамлакатда инфекцияга чалинганларнинг умумий сони 21,4 миллиондан ошди.
Tengrinews агентлиги Қозоғистон Ҳиндистонга ёрдам юбораётгани ҳақида хабар берди.
«Ҳиндистонда санитария-эпидемиология ҳолатининг кескин ёмонлашиши муносабати билан Қозоғистон президенти гуманитар ёрдам сифатида Ҳиндистонга 6 миллион тиббий ниқоб, 400 минг респиратор ниқоб, 50 минг комбинезон, Қозоғистонда ишлаб чиқарилган 105 та сунъий нафас олдириш аппарати юборишни буюрди», — дейилади хабарда.
Эслатиб ўтамиз, Ўзбекистон президенти Шавкат Мирзиёев топшириғига кўра, 1 май куни Деҳли шаҳрига инсонпарварлик кўмаги етказилган эди.
Бунга қадар АҚШ, Буюк Британия, Ирландия, Германия, Сингапур ва Австралия, Россия ҳам Ҳиндистонга инсонпарварлик ёрдами, жумладан, сунъий нафас олдириш аппаратлари, концентрланган кислород таъминоти ва шахсий ҳимоя воситаларини юборган эди.
Шунингдек, Жаҳон соғлиқни сақлаш ташкилоти (ЖССТ) Ҳиндистонда тобора ортиб бораётган коронавирусга чалиниш ҳолатларига қарши курашда ёрдам учун мамлакатга 2,6 мингдан ортиқ ходимини юборди.
Айни пайтда Ҳиндистонда оғир эпидемиологик вазият кузатилмоқда. Мамлакатда COVID-19’га чалиниш бўйича жаҳон рекорди кетма-кет янгиланмоқда. Мамлакатдаги эпидемиологик вазият «коронавирус бўрони» деб таърифланди.
Изоҳ (0)