Беларусь коронавирусга қарши ўз вакцинасини яратди. Россияда тўртинчи вакцина рўйхатдан ўтказилди

Беларусда COVID-19’га қарши вакцина ишлаб чиқилди. Бу ҳақда мамлакат президенти Александр Лукашенко маълум қилди, деб ёзади «РБК».

«Кеча ўз вакцинамизни олдик. У ҳозир сотиб олаётганимиздан фарқ қилади. Шифокорлар айтганидек «жонли вакцина», — деди Лукашенко.

Шу билан бирга, давлат раҳбари Беларусь ўз вакцинасини қўллашга шошилмаслигини таъкидлади, чунки касаллик ўзгариши ва юзага келадиган янги штамм «умуман бошқача» бўлиши мумкин. Унинг сўзларига кўра, ҳозирги вакциналар коронавируснинг янги турларига қарши ёрдам беришига кафолат йўқ.

«Вакцинамизни ўзимизда пайдо бўладиган штаммга мослаштирамиз. Ким билсин, эртага нима бўлади», — деди у.

Лукашенко 1 апрель куни Беларусда коронавирусга қарши вакцина яратиш тўғрисидаги буйруқни имзолаган. Унга кўра, Соғлиқни сақлаш вазирлиги ва Беларусь Миллий Фанлар академияси 2021–2023 йилларда вакцина яратиш билан шуғулланади.

Россия Соғлиқни сақлаш вазирлиги «Спутник Лайт» коронавирусига қарши бир компонентли вакцинани рўйхатдан ўтказди.

«Иммунизациядан кейин 28-кундан бошлаб бир компонентли вакцинанинг самарадорлиги 79,4 фоизни ташкил этди», — дейилади препаратни яратишни назорат қилувчи Россия тўғридан-тўғри инвестиция фондининг пресс-релизида.

Қайд этилишича, хориж бозорларида ушбу вакцинанинг нархи 10 доллардан кам бўлади.

«Спутник Лайт»дан эпидемиологик жараённинг ноқулай ривожланиши шароитида аҳоли иммунитетини тез шакллантириш учун фойдаланиш мумкин», — деб қўшимча қилди Соғлиқни сақлаш вазирлиги.

Март ойи охирида Россия Соғлиқни сақлаш вазирлигига «Спутник Лайт» вакцинасини рўйхатдан ўтказиш учун ариза топширилган эди.

Маълумот учун «Спутник Лайт» бу «Спутник V» вакцинасининг енгилроқ кўриниши бўлиб, у фақат бир компонентдан иборат ва фақат бир дозада қабул қилинади.