Twitter Трампнинг баёнотларини чиқариш учун очилган аккаунтларни блоклади

Twitter микроблоглар хизмати АҚШ собиқ президенти Дональд Трампнинг расмий веб-сайтидаги баёнотларни чоп этган DJTDesk аккаунтини блоклаб қўйди. Бу ҳақда NBC News хабар берди.

Хабарга кўра, DJTDesk аккаунти 6 май куни яратилган. Унда Трампнинг donaldjtrump.com шахсий веб-сайтидаги «From the Desk of Donald J. Trump» («Дональд Трамп столидан») бўлимида жойлаштирилган баёнотлари чоп этилган.

Аккаунт регистрациядан бир неча соат ўтгач блокланди. Twitter «блокировка қилинган аккаунт билан боғлиқ контентни алмашиш ёки тарғиб қилишни мақсад қилган» аккаунтларга қарши чоралар кўрилишини маълум қилди.

Трампнинг маслаҳатчиси Жейсон Миллернинг айтишича, блокланган Twitter аккаунтининг собиқ президент билан ҳеч қандай алоқаси йўқ.

BBC хабар беришича, Twitter’даги DJTDesk аккаунти блокланганидан сўнг худди шунга ўхшаш бир нечта аккаунтлар сақланиб қолган, улар собиқ президент веб-сайтидаги баёнотларни қайта жойлаштирган. Кейинчалик Twitter яна учта — DJTrumpDesk, DeskofDJT ва DeskOfTrump1 аккаунтларини блоклади.

4 май куни Трамп тарафдорлари билан мулоқот қилиш учун donaldjtrump.com сайтини ишга туширган эди. Фойдаланувчилар Трампнинг сайтга жойлаган постларини Twitter ва Facebook’да улашиши мумкин, аммо хабарларга жавоб бера олмайди.

Март ойи охирида Трамп ўз тарафдорлари билан мулоқот қилиш мақсадида ўзининг «45office.com» шахсий сайтини ишга туширган эди. Сайтда тарафдорлар билан очиқ-ойдин ёзишмалар олиб бориш имконияти мавжуд эмас.

Эслатиб ўтамиз, Дональд Трампни қўллаб-қувватловчилар томонидан ташкил этилган «Американи қутқариш марши» номли норозилик намойиши иштирокчилари 2021 йил 6 январь куни пойтахт Вашингтондаги Капитолий биносига бостириб кирган.

Натижада январь ойининг бошида Facebook ва Instagram Дональд Трампнинг аккаунтини президентлик муддати тугагунча блоклади. Twitter эса Трампнинг шахсий аккаунтини «кейинчалик зўравонликка даъват этишнинг юқори хавфига боғлиқлиги сабаб» бутунлай блоклади.

Кейинроқ Трампнинг маслаҳатчиси Жейсон Миллер Fox News телеканали эфирида АҚШнинг собиқ президенти икки-уч ой ичида «ўз платформаси билан» ижтимоий тармоқларга қайтишини айтди.