АҚШ ҳарбий контингенти Афғонистондан чиқарилгандан сўнг, Қўшма Штатлар ҳар қандай воқеалар ривожига тайёр туриши керак. Бу ҳақда АҚШ давлат котиби Энтони Блинкен CBS телеканалига берган интервьюсида айтиб ўтди.

Фото: Reuters

Блинкен қўшинлар чиқиб кетгандан сўнг, АҚШ томонидан қўллаб-қувватланаётган ҳукумат қулаши ва унинг ўрнини «Толибон» эгаллаши билан боғлиқ энг ёмон сценарийга Вашингтон тайёрми, деган саволга шундай жавоб берди: «Биз ҳар қандай сценарийга ва уларнинг бутун спектрига тайёр бўлишимиз керак. Сиз айтаётган ҳолатга табиий қараймиз», — деб жавоб берди Блинкен.

Давлат департаменти раҳбари Америка қўшинлари 20 йил мобайнида Афғонистонда бўлганини эслатиб ўтди. «Баъзан биз аввало нима мақсадда у ерга борганимизни унутиб қўямиз. Қўшинлар 11 сентябрда бизга ҳужум қилган одамларга қарши чоралар кўриш учун юборилган эди. Вазифамизни бажардик», — деди у.

Шу билан бирга, Блинкен қўшинларни олиб чиқиб кетиш АҚШ Афғонистонни бутунлай тарк этишини англатмаслигини айтди. Давлат котиби у ерда Америка элчихонаси қолишини таъкидлади. «Иқтисодиёт, тараққиёт ва гуманитар масалаларда қўллаб-қувватлашга келганда Афғонистонга кўрсатадиган ёрдамимиз ўз ўрнида қолаверади», — дея хулоса қилди у.

Аввалроқ Энтони Блинкен CNN нашрига берган интервьюсида ҳеч ким Афғонистонда фуқаролар урушининг қайта бошланишидан манфаатдор эмаслиги, бироқ ушбу сценарийнинг эҳтимоли мавжудлиги ҳақида гапирган эди.

Эслатиб ўтамиз, Америка ҳарбий қўмондонлиги 29 апрель куни АҚШ қўшинларини Афғонистон ҳудудидан олиб чиқишни бошлади. Аввал Шимолий Атлантика альянси (НАТО) штаб-квартираси аппаратининг вакили ҳам мазкур ташкилотнинг ҳарбийлари ҳам Афғонистондан чиқиб кетишни бошлаганини маълум қилганди.

АҚШ президенти Жо Байденнинг администрацияси Афғонистон ҳудудидаги ҳарбийларни олиб чиқиб кетишни 1 майда бошлаб, 11 сентябрда якунламоқчи. Аввалги администрация ҳам Афғонистондаги ҳарбийларни 1 майда олиб чиқиб кетишни бошлаш борасида «Толибон» билан келишиб олганди. Энди «Толибон» Байденнинг мазкур қарорини аввалги келишув шартларини бузиш деб ҳисобламоқда ва бунга нисбатан жавоб ҳаракатлари амалга оширилишини билдирган.