АҚШнинг Шимолий Кореяга нисбатан сиёсати душманликка қаратилмаган. Бу ҳақда АҚШ президентининг миллий хавфсизлик бўйича ёрдамчиси Жейк Салливанга таяниб, «Коммерсантъ» хабар берди.
Аввалроқ КХДР Ташқи ишлар вазирлиги АҚШ президенти Жо Байденнинг сўзларини танқид қилиб, Вашингтон душманлик сиёсатини олиб бораётгани ҳақида баёнот берган эди. Бунгача Жо Байден Конгрессдаги нутқи чоғида АҚШ КХДР ва Эроннинг ядро дастурлари таҳдидларига қарши туриш учун иттифоқчилар билан ўзаро ҳамкорлик қилишини айтган.
Жейк Салливан ABC телеканалига берган интервьюсида АҚШ Корея ярим оролини ядросизлантириш учун КХДР билан дипломатик ҳамкорлик қилишга тайёрлигини маълум қилди.
«Бизнинг Шимолий Кореяга нисбатан сиёсатимиз душманлик эмас, балки ечимларни топишга қаратилган. Бу Корея ярим оролининг тўлиқ ядросизланишига эришишни англатади. Биз ушбу якуний мақсадга эришиш учун дипломатияга тайёрмиз, аммо олдинга силжишимизга ёрдам берадиган амалий чоралар устида ҳам ишлаяпмиз », — деди Салливан.
Шимолий Корея Ташқи ишлар вазирлиги АҚШ президентининг «илк сиёсий нутқида КХДРга нисбатан ўз позициясини айнан шу тарзда баён қилганини номақбул» деб ҳисоблади. Пхенян «тегишли чораларни кўришга» ваъда бериб, вақт ўтиб Вашингтон «жуда қийин аҳволга тушиб қолиши» билан таҳдид қилди.
«Эндиликда АҚШнинг КХДРга нисбатан янги сиёсати бош ғояси аён бўлгани сабабли, биз тегишли чораларни кўришга мажбур бўламиз ва вақт ўтиши билан Қўшма Штатлар жуда оғир аҳволга тушиб қолади», — деди КХДР ташқи ишлар вазирлиги вакили баёнотида. Унинг фикрига кўра, АҚШ президентининг сўзлари Оқ уйнинг «душманлик сиёсатини давом эттириш» ғоясидан далолат беради.
Конгрессдаги нутқи давомида Байден КХДР ва Эроннинг ядровий дастурлари таҳдидларига қарши курашишда иттифоқчилар билан ўзаро ҳамкорлик қилиш ниятини билдирди. Унинг сўзларига кўра, Вашингтон «дипломатия ва кучли назорат» усулларини қўллайди. Оқ уй вакили Жен Псакининг таъкидлашича, АҚШ Шимолий Корея билан «стратегик сабр» ғоясидан воз кечади ва ушбу мамлакат билан йирик битим тузмайди.
Аввалроқ Шимолий Корея ҳукумати Вашингтон Пхенянга нисбатан душманлик сиёсатидан воз кечмагунча АҚШнинг янги маъмурияти билан алоқа ўрнатмаслигини айтган эди. Шимолий Корея ташқи ишлар вазири ўринбосарининг таъкидлашича, Пхенян ва Вашингтон ўртасидаги мулоқот «бир столда тенг ҳуқуқли ўтириб, фикр алмашиш» муҳитини талаб қилади.
Бунгача Оқ уй февраль ўрталаридан буён бир нечта дипломатик каналлар, шу жумладан, Нью-Йоркдаги каналлар орқали Пхенян билан боғланишга уриниб келгани, аммо Шимолий Корея раҳбарияти бу уринишларни эътиборсиз қолдирганини айтган.
Изоҳ (0)