Қирғизистон Ички ишлар вазирлиги Тожикистон билан чегарадаги вазиятни назорат қилмоқда, сулҳ бузилиши ҳолатлари қайд этилмади. Бу ҳақда 3 май, душанба куни муассаса матбуот хизмати маълум қилди, деб ёзади «Интерфакс».
«Боткен вилоятининг барча туманлари ва қишлоқларида вазият барқарор, тунги вақтда можаролар кузатилмади», — дейилади хабарда.
Ҳуқуқ-тартибот органлари маълумотларига кўра, ички ишлар органлари блокпостларда ва чегара яқинидаги туманларда хавфсизликни кучайтирмоқда, маҳаллий аҳоли билан тушунтириш ишлари олиб борилмоқда.
Сўнгги маълумотларга кўра, тўрт кунлик низо мобайнида Қирғизистон томонида 34 киши ҳалок бўлган, 178 киши жабрланган. Қирғизистон ИИВ маълумотларига кўра, низода ҳалок бўлганларнинг барчаси ўқотар қурол орқали ўлдирилган.
ФВВ маълум қилишича, ҳарбий низо оқибатида 78 та уй, иккита мактаб ва битта болалар боғчаси, шунингдек, учта чегара пости, ўнта ёқилғи қуйиш шохобчаси, саккизта дўкон, битта фельдшер-акушерлик пункти ва милиция биноси жиддий зарар кўрган.
Боткен вилояти аҳолисининг зарар кўрган уйлари давлат ҳисобидан тўлиқ тиклаб берилади. Вилоят маъмурияти маълумотларига қараганда, 60 мингдан ортиқ аҳоли низо ҳудудини тарк этган.
Қирғизистон чегара бўлинмалари ва ҳуқуқ-тартибот органлари кучайтирилган режимда хизмат ўташда давом этмоқда.
Тожикистон ҳукумати Қирғизистон билан чегарадаги тўқнашувларда ҳалок бўлганлар сони ҳақида расман эълон қилганича йўқ, аммо маҳаллий манбаларга кўра, 2 май кечқурун ҳолатига тахминан 16 киши ўлдирилган. Яраланганлар сони 110 кишидан ошади, улар орасида Исфара шаҳар мэри ҳам бор.
Тасдиқланмаган хабарларга кўра, Тожикистон томонида ҳалок бўлганлар сони 20 нафаргача, яраланганлар — 160 нафаргача бориши мумкин.
Изоҳ (0)