Эроннинг Кум шаҳридаги кимёвий заводда ёнғин содир бўлди, деб ёзади «РБК».
Ёнғин хизмати вакили Ҳамид Каримийнинг сўзларига кўра, «Моваллан» фабрикасидаги ёнғин маҳаллий вақт билан 6:00 (Тошкент вақти билан 9:30)да бошланган, оловни ўчиришга 100 дан ортиқ ўт ўчирувчи жалб қилинган.
Каримийнинг айтишича, ўт ўчирувчилар аланганинг спирт ва бошқа осон ўт олувчи суюқликлар сақланадиган омборхонага тарқалиб кетишининг олдини олишга муваффақ бўлган. Шунингдек, операция чоғида ёнғин хизмати машинаси ёниб кетган, оқибатда икки нафар ўт ўчирувчи жабрланган, улар зудлик билан касалхонага етказилган.
Ёнғин атрофида фавқулодда ҳолат эълон қилиниб, барча ташкилотлар, шу жумладан, Ислом инқилоби посбонлари корпуси, ёнғинга қарши кураш учун сафарбар қилинган.
«Моваллан» кимёвий заводи Эронда фталат ангидрид ишлаб чиқарувчи энг йирик хусусий корхона ҳисобланади.
Ушбу модда, ўз навбатида, турли пластмасса, бўёқлар ва авиация ёқилғиси учун қўшимчалар ишлаб чиқаришда муҳим бошланғич маҳсулот бўлиб ҳисобланади. Модда заҳарли бўлиб, тери ва кўз пардаси қичишишига олиб келиши мумкин.
Изоҳ (0)