Қирғизистон президенти Садир Жапаров можаро содир бўлган ҳудудга қўшни қишлоқларда яшовчи Қирғизистон ва Тожикистон оқсоқолларидан иборат «тинчликпарварлик комиссиясини» тузишни таклиф қилди. Бу ҳақда мамлакат президенти матбуот хизматига таяниб, «РБК» хабар берди.
«Кейинги тўқнашувларнинг олдини олиш учун мен қўшни ёки аралаш қишлоқларда яшовчи ҳар икки томоннинг оқсоқолларидан иборат тинчликпарварлик комиссиясини тузишни таклиф қиламан», — дейилади президентнинг халққа мурожаатида.
Жапаровнинг айтишича, Тожикистон билан зиддият пайтида Қирғизистоннинг ҳудудий яхлитлиги таҳдид остида бўлган, аммо «Қирғизистон чегарачилари ва ҳуқуқ-тартибот идораларининг тайёргарлиги, юксак маънавияти ва қаҳрамонлиги туфайли» ҳудудлар сақлаб қолинган.
Унинг сўзларига кўра, мамлакат ҳукумати «Боткенга зудлик билан боришни ва қўлига қурол олиб, шу орқали ўзларининг ватанпарварлигини намойиш этишни истаган» ёшларнинг ушбу ҳаракатларини тўғри тушунган, бироқ кенг миқёсли можаронинг олдини олиш ва барқарорликни сақлаш учун уларга қурол бермаган.
Қирғизистон президенти таъкидлашича, иккала томон ҳам такроран тўқнашувга йўл қўймаслиги керак, акс ҳолда бунинг натижасида кўплаб одамлар азият чекиши мумкин. Унинг сўзларига кўра, расмийлар вайрон бўлган ва ёниб кетган уйларни қайта тиклаш бўйича чоралар кўради ва одамларни яшаш жойларига қайтишга чақирди.
Қирғизистон ҳукумати матбуот хизмати Қирғизистон ва Тожикистон чегараларни аниқлаш ва белгилаш тўғрисида битим имзолагани ҳақида хабар берди.
Хабарга кўра, 2 май, якшанба куни Боткен вилоятида икки мамлакат ҳукумат делегацияларининг учрашуви бўлиб ўтди. Делегациялар раҳбарлари низоларни умумий чегарада тинч йўл билан ҳал қилиш зарурлигини таъкидлади.
«Қирғизистон—Тожикистон давлат чегараси лойиҳа линиясининг давлат чегарасининг қолган қисмларидан ўтишини янада тавсифлашни кучайтириш бўйича келишувга эришилди», — дейилади хабарда. Ҳукумат делегациялари учрашуви якунлари бўйича қўшма баённома имзолаган.
Қирғизистон Миллий хавфсизлик давлат қўмитаси раҳбари Қамчибек Ташиевнинг маълум қилишича, чегарадаги можаро ҳал қилингандан сўнг, Қирғизистон ва Тожикистон аввал бошдан эгалик қилиб келаётган ҳудудларини ўзида сақлаб қолади. «Биз ҳар икки томон ушбу воқеалардан олдин ўзларига тегишли бўлган ер участкаларига эгаликни давом эттиришига келишиб олдик», — деди у.
Шунингдек, ҳарбий хизматчилар ва ҳарбий техника қисмларини чегарадан уларнинг доимий жойларига олиб кетиш ва томонларнинг келишувлар бажарилишини назорат қилиш учун қўшма комиссия тузиш тўғрисида қарор қабул қилинди.
Шу билан бирга, «РИА Новости» Тожикистоннинг Исфар шаҳар ҳокимлигига таяниб, чегарадаги вазият тинч экани ҳақида хабар берди.
«Айни пайтда биз ўз қўшинларимизни чегарадан бутунлай олиб чиқдик. Чегарадаги қуролли тўқнашув тугади, энди биз имзоланган келишувнинг барча бандларини босқичма-босқич бажариб, Тожикистон ва Қирғизистон ўртасидаги чегара муаммосига чек қўйишимиз керак. Бизнинг асосий мақсадимиз одамларни тинч ҳаётга чақиришдир. Ҳаммаси ўтиб кетади. Бугун биз одамларни тинч ва ўзаро ҳамжиҳатликда яшаши учун ҳаракат қилишимиз керак», — деди Тожикистон Миллий хавфсизлик давлат қўмитаси раҳбари Сайимумин Ятимов.
Аввалроқ Қирғизистон ва Тожикистон ўз қўшинларини давлат чегарасидан олиб чиқиб кетишни бошлагани, шунингдек, низо чоғида гаровга олинган ўн нафар Қирғизистон фуқароси Тожикистонда асирликдан озод этилгани, низодан кейин 11 та жиноят иши қўзғатилгани хабар берилган эди.
Қирғизистон ва Тожикистон чегарасидаги низо 28 апрель куни маҳаллий аҳоли ўртасидаги жанжал билан бошланган эди. У эса тожикистонлик ҳарбийлар баҳсли ҳудудда жойлашган «Головной» сув тақсимлаш пункти яқинидаги электр устунига видеокузатув камераларини ўрнатганидан кейин келиб чиққан. Қирғизистон чегара хизматининг ахбороти бўйича 29 апрелда икки давлат ҳарбийлари ўртасида отишма содир бўлган.
Изоҳ (0)