Россия Олий суди ниқоб режимини бекор қилишни рад этди. Даъвогарларнинг бир қисми ниқоб тақмагани учун судга киритилмади

Россия Олий суди мамлакатда коронавирус пандемияси сабабли жорий қилинган мажбурий ниқоб режимини бекор қилиш тўғрисидаги жамоавий даъвони рад этди. Бу ҳақда Meduza хабар берди.

Хабарда айтилишича, Россиянинг турли минтақаларидан деярли 1500 киши Россия Истеъмолчилар ҳуқуқларини ҳимоя қилиш ва инсон фаровонлигини назорат қилиш федерал хизмати («Роспотребнадзор»)га қарши судга мурожаат қилган.

Олий суд мажлиси давомида даъвогарлар вакили Александр Саверский ниқоблар астма сингари сурункали касалликларга чалинганларнинг соғлиғига зарар етказишини, шунингдек, когнитив нуқсони бор кишиларга салбий таъсир кўрсатишини таъкидлаган.

«Роспотребнадзор» вакили, ўз навбатида, даъвогарларнинг далилларини субъектив ва ҳиссиётларга асосланган деб атаб, бош санитария шифокори томонидан тасдиқланган нормалар Россия Федерацияси фуқароларининг ҳуқуқларини бузмаслигини таъкидлади. Унинг фикри суд жараёнда мустақил томон сифатида иштирок этган Бош прокуратура вакили томонидан қўллаб-қувватланди.

Қайд этилишича, кўплаб даъвогарлар суд биносида ниқоб тақишдан бош тортгани сабабли уларга мажлисда қатнашишга рухсат берилмаган.

Россияда мажбурий ниқоб режими 2020 йил октябрь ойининг охирида жорий қилинган эди. 2021 йил февраль ойида Россиянинг икки ҳудуди — Удмуртия ва Чеченистонда ниқоб режими бекор қилинди, аммо федерал марказнинг танқидларидан сўнг улар яна аҳолига жамоат жойларида ниқоб тақишни тавсия қилишни бошлади.

Аввалроқ АҚШда 2022 йилда ҳам ниқоб тақиш мажбурияти сақланиб қолиши мумкинлиги ҳақида хабар берилганди. Мутахассиснинг сўзларига кўра, ниқоб режимини бекор қилиш фақатгина кунлик вирус юқтириш ҳолати сезиларли камайиб, аҳолининг катта қисми эмлангач ёки вирус тарқалиш хавфи минимал даражада пасайганидан сўнг эълон қилиниши мумкин.

Шунингдек, АҚШнинг Техас ва Миссисипи штатлари ҳукуматлари тиббий ниқоб тақиш мажбуриятини бекор қилгани ҳақида хабар берилганди.