Қозоғистон Соғлиқни сақлаш вазирлиги мамлакат фуқаролари орасида WhatsApp мессенжерида Кавасаки синдроми касаллигига чалиниш ҳолатлари кўпайгани ҳақида тарқалган хабарларни инкор этди. Бу ҳақда Tengrinews хабар берди.
Қозоғистон ССВ Кавасаки синдромига ўхшаш аломатлар ёки мултитизим яллиғланиш синдроми COVID-19’га чалиниб, ундан тузалган болаларда учрагани, бироқ ҳозирда мазкур хасталикнинг мамлакат бўйлаб тарқалмаганини билдирган.
«Мултитизим яллиғланиш синдроми — болаларда COVID-19’дан кейин учрайдиган иммунологик ҳодиса. Синдром коронавирус инфекциясидан кейин 4—6 ҳафтада ривожлана бошлайди. Айни вақтда Кавасаки синдромига ўхшаш мазкур аломатлар мамлакатимизда коронавирусга чалиниб, ундан тузалган болаларда кузатилмаяпти. Бироқ COVID-19 билан касалланишга алоқадор ҳолатлар кўпайса, ушбу синдромга чалиниш эҳтимоли ҳам кўпайиши мумкин. Шу сабабли эпидемияга қарши тавсия қилинган қоидаларга риоя этиш зарур», — дейилган Қозоғистон ССВ хабарида.
Вазирлик Кавасаки ва шунга ўхшаш синдром бу битта касаллик эмаслигини, бир-биридан фарқ қилишини қайд этган.
Кавасаки касаллиги — бу ҳар қандай инфекциядан кейин ривожланиши мумкин бўлган, камёб хасталик. Иситма, тошма тошиши, конъюнктивит, бўйиндаги лимфа тугунларининг катталашиши, танада сув йиғилиши касалликнинг асосий аломатлари ҳисобланади.
COVID-19’дан кейин кузатиладиган Кавасаки синдромига ўхшаш ҳолатда эса танада инфекциядан кейинги кечиккан иммунологик жавоб қайтариш функцияси ишга тушади. Бу нафақат болаларда, балки катталарда ҳам кузатилиши мумкин.
Мавзуга доир: Кавасакисимон синдром шаклидаги янги касалликнинг асосий клиник белгилари маълум қилинди
Эслатиб ўтамиз, 2020 йилда Қозоғистонда COVID-19’дан тузалганидан кейин Кавасаки синдромига ўхшаш касаллик билан оғриган икки нафар бола вафот этганди.
Изоҳ (0)