Bugun,

  • USD 10940.05
  • RUB 182.26
  • EUR 11121.65

Qo‘shma Shtatlarda jamoat joylarida niqob taqish majburiyati 2022-yilda ham saqlanib qolishi mumkin. Bu haqda AQShning Allergiya va yuqumli kasalliklar milliy instituti direktori, mamlakatning yuqumli kasalliklar bo‘yicha bosh mutaxassisi Entoni Fauchi CNN telekanaliga bergan intervyusida aytib o‘tdi, deb yozmoqda “RBK”.

Foto: AP Photo

Foto: AP Photo

“Fikrimcha, kelasi yil ham niqob taqish majburiy bo‘lishi mumkin”, — dedi Fauchi jurnalist savoliga javoban.

Mutaxassisning so‘zlariga ko‘ra, niqob rejimini bekor qilish faqatgina kunlik virus yuqtirish holati sezilarli kamayib, aholining katta qismi emlangach yoki virus tarqalish xavfi minimal darajada pasayganidan so‘ng e’lon qilinishi mumkin.

AQShda ilk bor niqob taqish talabi 2021-yilda joriy qilindi. 1-fevraldan aholining jamoat transporti, aeroport va temiryo‘l stansiyalarida niqob taqishi shart etib belgilandi. Ikki yoshdan kichik bolalar va muayyan tibbiy sharoitdagi kishilar uchun niqob taqish majburiy emas.

Bundan tashqari, mamlakat prezidenti Jo Bayden federal binolarda va davlat xizmatchilari uchun niqob taqish majburiyligi to‘g‘risida farmon imzoladi. NBC News manbalariga ko‘ra, Bayden ma’muriyati AQShning barcha fuqarolariga to‘g‘ridan to‘g‘ri niqob jo‘natish imkoniyatini muhokama qilmoqda.

AQShda niqob taqish masalasi qisman siyosiy tus olgan. Bayden bir necha marotaba sobiq prezident Donald Trampni COVID-19 tarqalishiga qarshi “hech narsa qilmaganlikda”, “faqat fond birjasida savdo qilish va prezidentlikka qayta saylanish maqsadidagi siyosiy nazariyalar bilan shug‘ullanganlikda” ayblagan edi.

Baydenning so‘zlariga ko‘ra, agar zudlik bilan cheklovlar, xususan, niqob rejimi o‘rnatilganda edi, AQShda 100 ming kishining hayotini saqlab qolishi mumkin edi. Tramp ham o‘z navbatida, iqtisodiyotni to‘liq blokirovkaga tushirish mumkin emas, deb javob bergan edi. “Biz pandemiya bilan yashashni o‘rganamiz, boshqa ilojimiz yo‘q. Baydenga o‘xshab yerto‘laga berkinib yasholmaymiz”, — degan edi u so‘nggi bahsda.

Prezidentlik paytida Tramp bir necha bor jamoat oldida niqobsiz paydo bo‘lgan, ammo AQSh aholisini masofa saqlash imkonsiz bo‘lgan joylarda xavfsizlik uchun niqob taqishga muntazam undab turgan.

Qo‘shma Shtatlarda koronavirus bilan kasallanish va o‘lim holati boshqa mamlakatlarga qaraganda yuqori o‘rinda. Jons Hopkins universiteti ma’lumotlariga ko‘ra, pandemiya boshidan beri mamlakatda 28,1 million kishi koronavirusga chalingan, 498,7 ming kishi kasallikdan vafot etgan. Oqibatida COVID-19 qurbonlari soni mamlakatning uchta urushdagi talafotlaridan oshib ketgan. 2-yanvar kuni AQShda virusga chalinish bo‘yicha kunlik ko‘rsatkich deyarli 300 ming kishini tashkil qilgan. 19-fevralga kelib ushbu ko‘rsatkich 106,3 ming kishigacha kamaygan.

Avvalroq Udmurtiya Rossiya hududlari ichida birinchi bo‘lib niqob taqish majburiyatini bekor qilgan edi. “12-fevraldan boshlab hududdagi niqob taqish rejimi tavsiyaviy xususiyatga ega bo‘ladi”, — deya ta’kidlagan hudud rahbari Aleksandr Brechalov.

Izoh
Asosiy yangiliklar
Dunyo
Irlandiyadagi qamoqxonada “buyuk qochish”, sakkiz soatli ish rejimini qo‘llagan Genri Ford va qon quyish bo‘yicha birinchi muvaffaqiyatli amaliyot. Kun xronologiya...
Mahalliy
“Daryo” reportaji: Namangandan topilgan zardushtiylar ibodatxonasining dunyoda tengi yo‘qligi aytilmoqda. Bu yerdagi 70 ta otashkadada tun-kun olov yonib turgan (v...
Madaniyat
O‘zbekistonda o‘tkazilgan Mokkoji Korea festivali va K-pop konserti — suratlarda