Сўнгги бир кеча-кундузда юз берган коронавирус билан боғлиқ энг муҳим хабарлар — «Дарё» коронадайжестида.
Worldometers портали маълумотларига кўра, 1 апрель ҳолатига, ўтган бир кеча-кундузда COVID-19’га чалиниш билан боғлиқ 640 205 та янги ҳолат қайд этилган. Бу январдан буён кузатилган рекорд кўрсаткич ҳисобланади.
Янги ҳолатларнинг энг кўпи Бразилияда қайд этилди — у ерда бир кунда 89 200 кишида вирус аниқланган. Ундан кейинда Ҳиндистон (72 182) ва АҚШ (68 756) бормоқда. Францияда ҳам вазият хавотирли бўлиб қолмоқда — у ерда бир кунда 40 минг киши касалланган.
Коронавирус пандемияси, афтидан, 2021 йилда тугамайди, деди Россия Истеъмолчилар ҳуқуқлари ҳимояси ва инсон фаровонлиги соҳасидаги назорат бўйича федерал хизмати Эпидемиология илмий-тадқиқот марказий институти директорининг илмий иш бўйича маслаҳатчиси Виктор Малеев.
«Пандемия, албатта, эртами-кечми тугайди, лекин шу йил деб ўйламайман, аммо Жаҳон соғлиқни сақлаш ташкилоти унинг тугаганини эълон қилади», — деди Малеев.
Шу билан бирга, коронавирус, унинг сўзларига кўра, мавсумий хусусиятга эга, шу сабабли ёзда касалланиш даражаси пасайиши мумкин. Айни вақтда Европада касалланиш ҳолатлари кўпаймоқда, Африкада ва Осиё мамлакатларининг баъзиларида эса тестдан ўтказиш қамровининг кичиклиги туфайли, вазият номаълум бўлиб турибди.
Унинг қўшимча қилишича, аҳолининг 70 фоизида коронавирусга қарши иммунитет пайдо бўлганидан кейин, пандемия пасая бошлайди.
Январда ЖССТ экспертлари дунёнинг турли мамлакатларида оммавий вакцинация бошланган бўлса-да, 2021 йилда коронавирусга нисбатан жамоавий иммунитет шаклланмаслигини маълум қилганди.
Мавзуга доир:
Исроилда энг кўп COVID-беморлар ётган, бир пайтлар бир йўла 140 нафар бемор даволанган Ҳадасса касалхонаси — Эйн-Керем 30 март куни бор-йўғи уч нафар янги беморни қабул қилган.
Исроил Соғлиқни сақлаш вазирлиги хабар қилишича, мамлакатнинг барча тиббий марказларида даволанаётган оғир касаллар сони 400 га яқин. 25 январда уларнинг сони 1100 дан ошарди. Бир ойча аввал баъзи беморлар касалхонага ётиш учун соатлаб навбат кутарди.
Таъкидланишича, ушбу вазият Исроилда аҳолининг оммавий эмланиши билан боғланмоқда.
Мавзуга доир: Исроилда вакцинация коронавирусни енгишни бошлади, бунга «британча» штамм ҳам тўсиқ бўлмаяпти
- Британияда AstraZeneca вакцинаси билан эмлангандан кейин тромбоз ҳосил бўлиши билан боғлиқ 30 та ҳолат ҳақида хабар берилди. Мутахассислар 24 мартгача келиб тушган шундай ҳисоботларни ўрганиб чиқди. Уларнинг 22 таси серебрал веноз синуслар тромбози билан боғлиқ бўлиб чиқди. Pfizer-BioNTech вакцинаси билан эмлаш вақтида бундай ҳолатлар ҳақида хабарлар келиб тушмаган.
- Грузияда COVID-19’га қарши эмлашдан кейин ножўя таъсирлар юз бериши билан боғлиқ 27 та ҳолат аниқланди. Март ўрталаридан бошлаб 3800 киши эмланган бўлса, шуларнинг 27 нафарида иккиламчи таъсирлар ёки реакциялар кузатилган, тўртта ҳолатда интенсив даволаш, учтасида — касалхонага ётқизиш, иккитасида — реанимация чоралари талаб этилган. Грузияда аҳоли AstraZeneca ва Pfizer вакциналари билан эмланмоқда.
- Беларусь президенти Александр Лукашенко коронавирус инфекциясига қарши маҳаллий вакцина яратиш тўғрисидаги фармонни имзолади. Унга кўра, вакцинани ишлаб чиқиш билан 2021—2023 йилларда мамлакат Соғлиқни сақлаш вазирлиги ва Беларусь Миллий фанлар академияси шуғулланади.
- Россияда эса дунёдаги биринчи касалланиб ўтган одамлар қони плазмаси асосидаги коронавирусга нисбатан иммуноглобулин рўйхатдан ўтказилди. Ушбу «Ковид-глобулин» дориси организмга касалликни енгиб ўтишда ёрдам беради ва одам иммунитетини мустақил тарзда тезроқ антитаналар ишлаб чиқишга ўргатади.
- Африкада коронавируснинг янги варианти аниқланди, у ўз ичига 40 та мутацияни олган бўлиши мумкин. Янги вариант биринчи марта Анголага келган Танзания фуқароларида қайд этилган. Вариант айни пайтда Жанубий Африка Республикасидаги лабораториялардан бирида ўрганилмоқда. Шунингдек, Африка пандемиянинг учинчи тўлқини томонга ҳаракатланиб бораётгани айтилмоқда.
Изоҳ (0)