Словакия президенти Зузана Чапутова 1 апрель куни бош вазир Эдуард Хегер раҳбарлигидаги янги ҳукумат таркибини тасдиқлади. Бу ҳақда «ТАСС» хабар берди.
Хабарга кўра, Вазирлар Маҳкамасининг таркибини тасдиқлаш бўйича тантанали маросим Братиславадаги Президент саройида ўтказилган ва маҳаллий телеканаллар томонидан трансляция қилинган.
Маросим давомида Хегер Словакия конституцияси ва қонунларига содиқлик билан хизмат қилишга қасамёд қилган.
Словакиянинг янги ҳукумати таркибига тўртта сиёсий бирлашманинг вакиллари, жумладан, Оддий одамлар ва мустақил шахслар партияси, Одамлар учун либерал-консерватив партияси, Озодлик ва бағрикенглик либерал партияси ҳамда Биз бир оиламиз сиёсий ҳаракати аъзолари киритилган. Эдуард Хегер Оддий одамлар ва мустақил шахслар партиясининг етакчиларидан бири ҳисобланади.
Эслатиб ўтамиз, бир неча кун аввал Словакия президенти «Спутник V» вакцинаси билан боғлиқ можаро туфайли бош вазир Игорь Марович истеъфосини қабул қилганди. Ундан аввал Словакия соғлиқни сақлаш вазири Марек Крайчи истеъфо берган.
Словакия Европа Иттифоқида «Спутник V»ни Европа дори-дармон агентлиги (EMA) маъқуллашидан олдин тасдиқлаган Венгриядан кейинги иккинчи мамлакатга айланганди. «Спутник V»га буюртма бериш Словакиянинг ҳукмрон коалициясида тортишувларга сабаб бўлди. Коалициядаги тўртта партиядан иккитаси EMA’нинг рухсатини кутишни талаб қилган.
Словакия собиқ бош вазири март ойи бошида Игорь Матович коронавирусга қарши «Спутник V» вакцинаси эвазига Россияга Украинанинг Закарпатье вилоятини бермоқчилигини айтиб, ҳазил қилган. Украина ташқи ишлар вазирлиги Матовичдан айтган сўзлари учун расмий равишда кечирим сўрашни талаб қилди. Матович «ноўрин гапи» учун «барча украиналиклардан» кечирим сўраган.
Изоҳ (0)