Rossiya Oliy sudi mamlakatda koronavirus pandemiyasi sababli joriy qilingan majburiy niqob rejimini bekor qilish to‘g‘risidagi jamoaviy da’voni rad etdi. Bu haqda Meduza xabar berdi.
Xabarda aytilishicha, Rossiyaning turli mintaqalaridan deyarli 1500 kishi Rossiya Iste’molchilar huquqlarini himoya qilish va inson farovonligini nazorat qilish federal xizmati (“Rospotrebnadzor”)ga qarshi sudga murojaat qilgan.
Oliy sud majlisi davomida da’vogarlar vakili Aleksandr Saverskiy niqoblar astma singari surunkali kasalliklarga chalinganlarning sog‘lig‘iga zarar yetkazishini, shuningdek, kognitiv nuqsoni bor kishilarga salbiy ta’sir ko‘rsatishini ta’kidlagan.
“Rospotrebnadzor” vakili, o‘z navbatida, da’vogarlarning dalillarini subyektiv va hissiyotlarga asoslangan deb atab, bosh sanitariya shifokori tomonidan tasdiqlangan normalar Rossiya Federatsiyasi fuqarolarining huquqlarini buzmasligini ta’kidladi. Uning fikri sud jarayonda mustaqil tomon sifatida ishtirok etgan Bosh prokuratura vakili tomonidan qo‘llab-quvvatlandi.
Qayd etilishicha, ko‘plab da’vogarlar sud binosida niqob taqishdan bosh tortgani sababli ularga majlisda qatnashishga ruxsat berilmagan.
Rossiyada majburiy niqob rejimi 2020-yil oktabr oyining oxirida joriy qilingan edi. 2021-yil fevral oyida Rossiyaning ikki hududi — Udmurtiya va Chechenistonda niqob rejimi bekor qilindi, ammo federal markazning tanqidlaridan so‘ng ular yana aholiga jamoat joylarida niqob taqishni tavsiya qilishni boshladi.Avvalroq AQShda 2022-yilda ham niqob taqish majburiyati saqlanib qolishi mumkinligi haqida xabar berilgandi. Mutaxassisning so‘zlariga ko‘ra, niqob rejimini bekor qilish faqatgina kunlik virus yuqtirish holati sezilarli kamayib, aholining katta qismi emlangach yoki virus tarqalish xavfi minimal darajada pasayganidan so‘ng e’lon qilinishi mumkin.
Shuningdek, AQShning Texas va Missisipi shtatlari hukumatlari tibbiy niqob taqish majburiyatini bekor qilgani haqida xabar berilgandi.
Izoh (0)