Москвада ўта ноёб Rolls-Royce Phantom 1,2 млн долларга сотувга қўйилди (фото)

Москвада Zenith чекланган сериясига кирувчи 50 та Rolls-Royce Phantom Drophead Coupe’дан бири сотувга қўйилди. Расмий дилерлик маркази 2016 йилда яратилган ва ҳозирга қадар умуман ҳаракатланмаган оқ-қора рангли автомобиль учун 92 миллион рубль (1,2 миллион доллар) сўрамоқда, деб хабар беради Motor.

Rolls-Royce Phantom Drophead Coupe Zenith 2016 йилда еттинчи авлод «Фантом»ларни ишлаб чиқариш якунлангани муносабати билан чиқарилган. Чекланган сериядан 50 та купе ва кабриолет ўрин олган бўлиб, улар эксклюзив ранглари ва интерьери билан фарқланади. Муҳандислар тирсакқўйгич жойга Италиядаги машҳур D’Este вилласи, шунингдек, Женева кўли тасвирларини туширган. Айнан ушбу ҳудудларда Британия компанияси икки эшикли Phantom прототипларини тақдим этган.

Сотувга қўйилган Rolls-Royce ўз сериясининг 24-автомобили ҳисобланади. Машинанинг олд ўриндиқлари оқ, орқадагиси қора чармдан ишланган. Бундан ташқари, «Фантом» юкхонасига мутахассислар мини-музлаткич, пикник учун кичик стол ҳам жойлаштирган. Икки хил ранг ўзига хос тарзда ишлатилган. Хусусан, Midnight Blue ранги 1930 йиллардаги Rolls-Royce’ларда фойдаланилган жилога ўхшайди.

Rolls-Royce Phantom Drophead Coupe капоти остидан 460 от кучи ва 719 Нм айланувчи моментни тақдим этишга қодир 6,75 литрли V12 двигатели ўрин олган. Кабриолет соатига 100 километр тезликка 5,8 сонияда эришади, максимал тезлиги — 240 километр/соат.

Москвадаги расмий дилер уч километр йўл босган эксклюзив Rolls-Royce’ни 92 миллион рублга баҳолаган.

Аввалроқ Rolls-Royce компанияси Google вице-президенти учун яратилган ҳашаматли Cullinan’ни намойиш этганди.