Фарғонада маст ҳайдовчи йўлнинг қатнов қисмида кетаётган икки нафар пиёдани уриб юборди, дея хабар берди «Дарё» мухбири.
Маълум қилинишича, 2021 йил 25 март куни кеч соат 20:00 да Данғара тумани «Найман» маҳалла фуқаролар йиғини ҳудудидан ўтган 4Н-943 Найманча—Чумоч автомобиль йўлининг 1-километрида ўлим билан боғлиқ йўл-транспорт ҳодисаси рўй берган. Changhe pai русумли автомашинани ишонч қоғози билан бошқариб кетаётган маст ҳайдовчи — 1975 йилда туғилган Қ.Б. ҳаракат хавфсизлигини таъминлай олмай, йўлнинг қатнов қисмида кетаётган икки нафар пиёдани уриб юборган.
Натижада Фурқат тумани Ингичка қишлоғида яшовчи 1984 йилда туғилган Ш.М. оғир тан жароҳати олиб шифохонага ётқизилган. Кўрсатилган тиббий ёрдамга қарамай жабрланувчи шифохонада вафот этган.
Фурқат тумани Ингичка қишлоғида яшовчи 1984 йилда туғилган М.О. эса енгил тан жароҳати билан шифохонага мурожаат қилган. Унга биринчи тиббий ёрдам кўрсатилиб, уйига рухсат берилган.
Мазкур ҳолат юзасидан Жиноят кодексининг тегишли моддаси билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Аввалроқ Самарқандда Gentra ва Cobalt иштирокида содир бўлган ЙТҲ оқибатида икки нафар йўловчи ҳалок бўлгани, Тошкентда эса Cobalt қарама-қарши йўналишдаги Lacetti’га урилиши оқибатида икки киши вафот этгани хабар қилинганди.
Мавзуга доир:
Изоҳ (0)