Moskvada Zenith cheklangan seriyasiga kiruvchi 50 ta Rolls-Royce Phantom Drophead Coupe’dan biri sotuvga qo‘yildi. Rasmiy dilerlik markazi 2016-yilda yaratilgan va hozirga qadar umuman harakatlanmagan oq-qora rangli avtomobil uchun 92 million rubl (1,2 million dollar) so‘ramoqda, deb xabar beradi Motor.
Rolls-Royce Phantom Drophead Coupe Zenith 2016-yilda yettinchi avlod “Fantom”larni ishlab chiqarish yakunlangani munosabati bilan chiqarilgan. Cheklangan seriyadan 50 ta kupe va kabriolet o‘rin olgan bo‘lib, ular eksklyuziv ranglari va interyeri bilan farqlanadi. Muhandislar tirsakqo‘ygich joyga Italiyadagi mashhur D’Este villasi, shuningdek, Jeneva ko‘li tasvirlarini tushirgan. Aynan ushbu hududlarda Britaniya kompaniyasi ikki eshikli Phantom prototiplarini taqdim etgan.
Sotuvga qo‘yilgan Rolls-Royce o‘z seriyasining 24-avtomobili hisoblanadi. Mashinaning old o‘rindiqlari oq, orqadagisi qora charmdan ishlangan. Bundan tashqari, “Fantom” yukxonasiga mutaxassislar mini-muzlatkich, piknik uchun kichik stol ham joylashtirgan. Ikki xil rang o‘ziga xos tarzda ishlatilgan. Xususan, Midnight Blue rangi 1930-yillardagi Rolls-Royce’larda foydalanilgan jiloga o‘xshaydi.
Rolls-Royce Phantom Drophead Coupe kapoti ostidan 460 ot kuchi va 719 Nm aylanuvchi momentni taqdim etishga qodir 6,75 litrli V12 dvigateli o‘rin olgan. Kabriolet soatiga 100 kilometr tezlikka 5,8 soniyada erishadi, maksimal tezligi — 240 kilometr/soat.
Moskvadagi rasmiy diler uch kilometr yo‘l bosgan eksklyuziv Rolls-Royce’ni 92 million rublga baholagan.
Avvalroq Rolls-Royce kompaniyasi Google vitse-prezidenti uchun yaratilgan hashamatli Cullinan’ni namoyish etgandi.
Mavzuga doir:
Izoh (0)