Россия президентининг матбуот котиби Дмитрий Песков мухолифатчи Алексей Навальнийнинг очлик эълон қилгани ҳақидаги хабарларга изоҳ беришдан бош тортди. Бу ҳақда Meduza хабар берди.
«Ҳеч қандай изоҳ йўқ», — деди у журналистлар билан ўтказилган учрашувда.
Кремль вакилининг қўшимча қилишича, бу мавзу «ҳеч қанақасига давлат раҳбарининг кун тартибидаги масала бўлолмайди».
«Бизда жазони ижро этиш федерал хизмати муассасаларидаги ҳолатни назорат қилувчи инсон ҳуқуқлари ва жамоат ташкилотлари мавжуд. Улар савол ва таклифларни тузади, расмийлар билан алоқада бўлиб, аслида, уларнинг ўзлари шакллантирган ушбу таклифларнинг муҳокамаси билан шуғулланади. Барча истисно ҳолатлар жазони ижро этиш федерал хизмати ва тегишли идоралар томонидан кўриб чиқилиши керак, бу ҳеч қанақасига бизнинг изоҳларимиз учун мавзу ҳисобланмайди», — деди Песков Россия қамоқхоналаридаги тиббий ёрдам кўрсатиш билан боғлиқ муаммолар ҳақида гапириб.
Маълумот учун, айни вақтда қамоқхонада жазо муддатини ўтаётган россиялик сиёсатчи, мухолифат вакили Алексей Навальний очлик эълон қилди.
«Мен шифокор чақириш ва дори-дармонлар олиш ҳуқуқига эгаман. Аммо шифокор ҳам, дорилар ҳам олиб келинмаяпти. Белимдаги оғриқ оёғимга ўтди. Дастлаб ўнг, кейинчалик чап оёғимнинг сезиш қобилиятлари йўқолди. Ҳазил ҳазил билан, бироқ вазият кескинлашиб бормоқда. Қонун ижроси таъминланмагани ва ҳузуримга шифокор олиб келинмагани сабабли очлик эълон қилдим», — деган Навальний.
Навальний Россиянинг Владимир вилоятидаги 2-сонли ахлоқ тузатиш колониясида жазо ўтамоқда. Аввал Навальнийнинг адвокатлари колонияда сиёсатчининг соғлиғи ёмонлашиб, елкаси, сўнг оёғи оғриб қолгани, аммо унга керакли тиббий ёрдам кўрсатилмагани ҳақида хабар берган. Федерал жазони ижро этиш хизмати, ўз навбатида, Навальнийнинг аҳволини «барқарор ва қониқарли деб баҳолаганини» маълум қилганди.
Кейинчалик Россия президенти Владимир Путин Германия канцлери Ангела Меркель ва Франция президенти Эммануэль Макрон билан видеоконференцалоқа орқали музокаралар ўтказгани, Германия ва Франция раҳбарлари Путиннинг эътиборини Россия мухолифати раҳбари Алексей Навальнийнинг ҳуқуқларини ҳурмат қилиш ва «соғлиғини асраш» зарурлигига қаратгани ҳақида хабар қилинган.
Алексей Навальний «Новичок»дан заҳарланганидан кейин Германияда даволаниб қайтгач, 2021 йил 17 январда Жазони ижро этиш федерал хизмати талабига кўра Шереметьево аэропортида ҳибсга олинган. 2 февралда Москвадаги Симонов суди Навальнийага нисбатан «Ив Роше» иши бўйича шартли муддатни қамоқ жазосига алмаштирган. Навальний маълум муддат тергов изоляторида бўлгани ва уй қамоғида ҳам сақлангани инобатга олинган ҳолда унга икки ярим йилдан кўпроқ муддатга озодликдан маҳрум қилиш жазоси тайинланган. У Владимир вилоятидаги ИК-2 қамоқхонасида жазо муддатини ўтамоқда.
23 январда Россиянинг 100 дан ортиқ шаҳарларида Алексей Навальнийни қўллаб-қувватлаш мақсадида норозилик намойишлари ўтказилган. Кейинчалик 31 январь, 2 ва 14 февралда ҳам намойишлар бўлиб ўтган. «ОВД-Инфо» берган маълумотларга кўра, намойишлар туфайли 11 мингга яқин одам ҳибсга олинган.
Изоҳ (0)