Грузияда россиялик журналист Владимир Познернинг ташрифи туфайли норозилик намойиши бўлиб ўтди

Тбилисида россиялик журналист Владимир Познер турган Vinotel Boutique меҳмонхонаси яқинида норозилик акцияси бошланди. Бу ҳақда «РБК» хабар берди.

Хабарга кўра, меҳмонхона яқинида полиция билан тўқнашган норозилик намойишчилари бинога тухумлар улоқтирган. Познер полиция қуршовида меҳмонхонадан чиқиб кетган. Маълумотларга кўра, у ва унга ҳамроҳлик қилувчилар Rooms меҳмонхонасига кўчирилган, аммо намойишчилар у ерда ҳам тўпланиб, тухум улоқтиришни бошлаган ва бинога бостириб киришга ҳаракат қилган. Interpress хабарига кўра, баъзи фаоллар меҳмонхонада тунашни ва эрталаб намойишни давом эттиришни режалаштирганини айтган.

Таъкидланишича, Познер Грузия пойтахтига туғилган кунини нишонлаш учун келган. «Тбилисида учинчи йил туғилган кунимни нишонламоқдаман. Мен сиёсат ҳақида гаплашиш учун эмас, балки туғилган кунимни нишонлаш учун келдим», — деди Познер журналистларга.

Бир қатор сиёсатчилар, масалан, депутат Елена Хоштария ва «Грузия учун Лело» партияси аъзоси Григол Гегелия журналистнинг Жанубий Осетия ва Абхазиядаги вазиятга муносабатидан келиб чиқиб, унинг мамлакатга ташрифи номақбул эканини таъкидлади. Илгари Познер Абхазия аҳолиси Грузиянинг бир қисми бўлишни хоҳламаганини айтган. «Албатта, бу илмий тадқиқотлар эмас, лекин мен умумий қилиб абхазияликлар Грузиянинг бир қисми бўлишни истамаган деган фикрга келдим», — деган эди у 2017 йилда.

«РИА Новости» хабарига кўра, Владимир Познер айни пайтда хавфсиз жойда эканини маълум қилган. Таъкидланишича, журналист Тбилисидан 3 апрель куни кетишни режалаштирган эди. «Аммо бугунги вазиятда қачон кетишимиз ҳақида бир нарса деёлмайман, эҳтимол режадан олдинроқ кетармиз», — деди Познер.

Бу россияликнинг ташрифи муносабати билан Тбилисида бўлаётган биринчи норозилик намойиши эмас. 2019 йил июнь ойида мамлакат парламенти биносида Парламентлараро православие ассамблеяси йиғилиши бўлиб ўтганди. Ассамблея раҳбари — Россия давлат Думаси депутати Сергей Гаврилов. Ассамблея йиғилиши пайтида Гаврилов Грузия парламенти спикерининг курсисига ўтирган, бу эса мухолифат партияларининг норозилигига сабаб бўлган. Норозилик сифатида улар суд залидан чиқиб кетган. Депутатнинг ўзи қабул қилувчи томон шу жойда ўтириш сўралганини айтган.

Натижада Тбилисида норозилик намойишлари бошланиб, полиция билан тўқнашувлар бўлиб ўтди. Намойишчилар парламент раҳбарининг истеъфосини ва муддатидан олдин сайловлар ўтказилишини талаб қилди. Грузия парламенти спикери Ираклий Кобахидзе намойишчиларнинг талабларини бажариб, истеъфога чиқди. Грузия президенти Саломе Зурабишвили кейинчалик Россияни мамлакатнинг «душмани ва босқинчиси» деб атади.