Францияда яна умуммиллий карантин, Молдовада фавқулодда ҳолат эълон қилинди, 15 миллион доза Johnson & Johnson вакцинаси яроқсиз бўлиб чиқди. Коронахабарлар

Сўнгги бир кеча-кундузда юз берган коронавирус билан боғлиқ энг муҳим хабарлар — «Дарё» коронадайжестида.

3 апрелдан бутун Францияда навбатдаги, пандемия бошидан буён учинчи умуммиллий карантин жорий қилинади, у тўрт ҳафта мобайнида амал қилади. Бу ҳақда мамлакат президенти Эммануэль Макрон ўз телемурожаатида маълум қилди.

Карантин доирасида қуйидаги чеклов чоралари киритилади:

• ходимлар яна масофадан ишлашга қайтади;
• энг зарур маҳсулотлар сотиладиган дўконлардан бошқа ҳаммаси ёпилади;
• болалар боғчалари, мактаблар ва коллежлар уч ҳафтага ёпилади. ОТМлар талабалари ҳафтада бир марта дарсга келиши мумкин;
• узрли сабабсиз уйдан 10 километрдан узоқроққа кетиш тақиқланади. Ҳудудлараро сафарлар фақат Пасха байрамлари даврида мумкин.

Янги карантинни жорий қилиш заруриятини Макрон Францияда коронавируснинг «британча» штамми тарқалиши билан изоҳлади. Унинг қўшимча қилишича, ҳукумат COVID-19 билан боғлиқ чекловларни май ўрталарига келиб бекор қилишни бошлашни режалаштирмоқда.

Бунгача карантин Франциянинг 19 та департаментида жорий қилинган эди (мамлакатнинг қитъа қисмида жами 96 та департамент). Бундан ташқари, мамлакатнинг бутун ҳудудида кечқурун еттидан эрталаб олтигача комендантлик соати амал қилиб келганди, барлар, ресторанлар, музей, кинотеатр ва бошқа жамоатчилик жойлари ёпилган эди.

Франция айни пайтда дунёда коронавирусга чалинганлар сони бўйича тўртинчи ўринни эгаллаб турибди. Пандемия бошидан буён мамлакатда 4,6 миллион кишида вирус аниқланган, шуларнинг 95,5 минг нафари вафот этган. Сўнгги бир кеча-кундузда 59 мингдан ортиқ касалланиш ҳолати қайд этилган.

Молдовада коронавирус инфекциясининг тарқалиши хавфи туфайли 1 апрелдан 30 майга қадар фавқулодда ҳолат эълон қилинди. Фавқулодда ҳолат режимини киритишни ёқлаб Қонунчилик мажлисининг 101 аъзосидан 52 нафари овоз берди. Молдова президенти Майя Сандунинг «Ҳаракат ва бирдамлик» партиясидан чиққан депутатлар фавқулодда ҳолат учун овоз бермади.

Мамлакат бош вазири вазифасини бажарувчи Аурелиу Чокой ҳукумат ҳозирча тўлиқ локдаун жорий қилмоқчи эмаслигини айтди. Парламент қарорига кўра, хусусан, қуйидаги чоралар киритилади:

• мамлакатдан чиқиш ва кириш қоидалари кучайтирилади;
• мамлакат ҳудудида ҳаракатланиш бўйича алоҳида режим жорий этилади;
• оммавий тадбирлар бекор қилинади;
• озиқ-овқат маҳсулотлари ва энг зарур буюмларнинг меъёрлаштирилган истеъмоли жорий қилинади.

Молдовалик мактаб ўқувчилари онлайн-таълимни давом эттиради, деди Чокой. Унинг аниқлик киритишича, республикада эпидемиологик вазият ўта ёмонлашган, вақтинчалик ҳукуматда эса ўз вақтида чоралар кўриш учун ваколатлар етарли эмас. Мамлакатда COVID-19’га чалиниш ҳолатлари оғирлашган, интенсив даволаш бўлимлари тўлиб кетган. Устига-устак, Молдовада коронавируснинг «британча» штамми аниқланган.

Сўнгги маълумотларга кўра, Молдовада коронавирусга чалинганлар сони 230 541 кишига етган. 18 мартдан мамлакатда вакцинация кампанияси бошланди.

Американинг Johnson & Johnson компаниясининг Балтимордаги заводи ходимлари бир неча ҳафта аввал коронавирусга қарши вакцина масаллиқларини аралаштиришда хатоликка йўл қўйган, оқибатда 15 миллион доза дори йўқотилган. Бу ҳақда The New York Times ва Bloomberg хабар бермоқда.

Ҳодиса Emergent BioSolutions Inc корхонасида юз берган, унга эса АҚШ озиқ-овқат ва дорилар сифати бўйича бошқарма (FDA) томонидан Johnson & Johnson вакциналарини ишлаб чиқариш учун сертификат берилмаган эди.

Johnson & Johnson дори воситасининг ушбу партияси сифат текширувидан ўтмаганини, стандартларга мувофиқ келмаганини маълум қилди.

Воқеа туфайли FDA заводни текширувдан ўтказади. АҚШ тиббий муассасаларига етказиб берилган вакциналарнинг барча партиялари хавфсиз, чунки улар Johnson & Johnson’нинг Нидерландиядаги заводларида ишлаб чиқарилган, аммо кейинги партиялар Балтимордаги заводдан етказилиши режалаштирилган эди, энди эса текширув туфайли етказиб бериш кечикади.

Шунингдек:

• Финляндияда қисман локдаун жорий қилишга қаршилик кўрсатилди. Финляндия парламентининг конституциявий қўмитаси 31 март куни ҳукуматнинг коронавирусга чалиниш даражаси юқори бўлган туманларда қисман локдаун киритиш режасини рад этди. Бу қарордан кейин мамлакат бош вазири Санна Марин ҳукумат локдаун ҳақидаги қонун лойиҳасини қайтариб олишини маълум қилди. Унинг айтишича, мамлакатда эпидемиологик вазият жиддий бўлиб қолмоқда.
• Швеция ҳукумати коронавирус билан касалланиш даражаси юқори бўлгани сабабли чеклов чоралари муддатини узайтирди. Ресторан, паб, кафе, дўкон, спорт заллари ва музейлар фаолияти билан боғлиқ чекловлар камида 3 майгача узайтирилади.
• Бельгияда эса ҳуқуқ ҳимоячилари пандемия шароитида қабул қилинган фавқулодда чораларнинг бекор қилинишига эришди. Брюссель биринчи инстанция суди Бельгия давлатига фавқулодда чоралаэни бекор қилиш мажбуриятини юкловчи қарорни қабул қилди, бунинг учун 30 кун муддат берилди.