Rossiya prezidentining matbuot kotibi Dmitriy Peskov muxolifatchi Aleksey Navalniyning ochlik e’lon qilgani haqidagi xabarlarga izoh berishdan bosh tortdi. Bu haqda Meduza xabar berdi.
“Hech qanday izoh yo‘q”, — dedi u jurnalistlar bilan o‘tkazilgan uchrashuvda.
Kreml vakilining qo‘shimcha qilishicha, bu mavzu “hech qanaqasiga davlat rahbarining kun tartibidagi masala bo‘lolmaydi”.
“Bizda jazoni ijro etish federal xizmati muassasalaridagi holatni nazorat qiluvchi inson huquqlari va jamoat tashkilotlari mavjud. Ular savol va takliflarni tuzadi, rasmiylar bilan aloqada bo‘lib, aslida, ularning o‘zlari shakllantirgan ushbu takliflarning muhokamasi bilan shug‘ullanadi. Barcha istisno holatlar jazoni ijro etish federal xizmati va tegishli idoralar tomonidan ko‘rib chiqilishi kerak, bu hech qanaqasiga bizning izohlarimiz uchun mavzu hisoblanmaydi”, — dedi Peskov Rossiya qamoqxonalaridagi tibbiy yordam ko‘rsatish bilan bog‘liq muammolar haqida gapirib.
Ma’lumot uchun, ayni vaqtda qamoqxonada jazo muddatini o‘tayotgan rossiyalik siyosatchi, muxolifat vakili Aleksey Navalniy ochlik e’lon qildi.
“Men shifokor chaqirish va dori-darmonlar olish huquqiga egaman. Ammo shifokor ham, dorilar ham olib kelinmayapti. Belimdagi og‘riq oyog‘imga o‘tdi. Dastlab o‘ng, keyinchalik chap oyog‘imning sezish qobiliyatlari yo‘qoldi. Hazil hazil bilan, biroq vaziyat keskinlashib bormoqda. Qonun ijrosi ta’minlanmagani va huzurimga shifokor olib kelinmagani sababli ochlik e’lon qildim”, — degan Navalniy.
Navalniy Rossiyaning Vladimir viloyatidagi 2-sonli axloq tuzatish koloniyasida jazo o‘tamoqda. Avval Navalniyning advokatlari koloniyada siyosatchining sog‘lig‘i yomonlashib, yelkasi, so‘ng oyog‘i og‘rib qolgani, ammo unga kerakli tibbiy yordam ko‘rsatilmagani haqida xabar bergan. Federal jazoni ijro etish xizmati, o‘z navbatida, Navalniyning ahvolini “barqaror va qoniqarli deb baholaganini” ma’lum qilgandi.
Keyinchalik Rossiya prezidenti Vladimir Putin Germaniya kansleri Angela Merkel va Fransiya prezidenti Emmanuel Makron bilan videokonferensaloqa orqali muzokaralar o‘tkazgani, Germaniya va Fransiya rahbarlari Putinning e’tiborini Rossiya muxolifati rahbari Aleksey Navalniyning huquqlarini hurmat qilish va “sog‘lig‘ini asrash” zarurligiga qaratgani haqida xabar qilingan.
Aleksey Navalniy “Novichok”dan zaharlanganidan keyin Germaniyada davolanib qaytgach, 2021-yil 17-yanvarda Jazoni ijro etish federal xizmati talabiga ko‘ra Sheremetyevo aeroportida hibsga olingan. 2-fevralda Moskvadagi Simonov sudi Navalniyaga nisbatan “Iv Roshe” ishi bo‘yicha shartli muddatni qamoq jazosiga almashtirgan. Navalniy ma’lum muddat tergov izolyatorida bo‘lgani va uy qamog‘ida ham saqlangani inobatga olingan holda unga ikki yarim yildan ko‘proq muddatga ozodlikdan mahrum qilish jazosi tayinlangan. U Vladimir viloyatidagi IK-2 qamoqxonasida jazo muddatini o‘tamoqda.
23-yanvarda Rossiyaning 100 dan ortiq shaharlarida Aleksey Navalniyni qo‘llab-quvvatlash maqsadida norozilik namoyishlari o‘tkazilgan. Keyinchalik 31-yanvar, 2 va 14-fevralda ham namoyishlar bo‘lib o‘tgan. “OVD-Info” bergan ma’lumotlarga ko‘ra, namoyishlar tufayli 11 mingga yaqin odam hibsga olingan.
Izoh (0)