Россиянинг Владимир вилоятидаги 2-сонли ахлоқ тузатиш колониясида жазо ўтаётган Алексей Навальний икки ҳафта ичида олтита танбеҳ олди. Бу ҳақда сиёсатчи номидан Facebook саҳифасига жойланган постда маълум қилинди, деб ёзади Meduza.
«Икки марта танбеҳ олсангиз, жазо камераси (режимни бузувчилар сақланадиган камера)га юборилишингиз мумкин, аммо бу жуда ёқимсиз, чунки у ердаги шароит деярли қийноқ билан баробар», — дейилади постда.
Унда танбеҳнинг баъзи сабаблари санаб ўтилган, жумладан, Навальний «ўрнингдан тур» буйруғидан 10 дақиқа олдин ётоқдан турган ва «адвокатлар билан учрашувда футболка кийган».
Владимир вилоятининг Покров шаҳридаги 2-сонли ахлоқ тузатиш колонияси — бу қизил колония деб аталиб, маъмурият маҳбусларни тўлиқ назорат қиладиган ахлоқ тузатиш муассасаси ҳисобланади.
25 март куни Навальнийнинг адвокатлари колонияда сиёсатчининг соғлиғи ёмонлашиб, елкаси, сўнг оёғи оғриб қолгани, аммо унга керакли тиббий ёрдам кўрсатилмагани ҳақида хабар берди. Федерал жазони ижро этиш хизмати ўз навбатида, Навальнийнинг аҳволини «барқарор ва қониқарли деб баҳолаганини» маълум қилди.
Навальний, шунингдек, тергов ҳибсхонасидаги каби бу ерда ҳам «қочишга мойил» мақомини олгани, тунда оғриқлардан ҳар соатда уйғонишини таъкидлаган.
Эслатиб ўтамиз, Алексей Навальний «Новичок»дан заҳарланганидан кейин Германияда даволаниб қайтгач, 2021 йил 17 январда Жазони ижро этиш федерал хизмати талабига кўра Шереметьево аэропортида ҳибсга олинган. 2 февралда Москвадаги Симонов суди Навальнийга нисбатан «Ив Роше» иши бўйича шартли муддатни қамоқ жазосига алмаштирган. Навальний маълум муддат тергов изоляторида бўлгани ва уй қамоғида ҳам сақлангани инобатга олинган ҳолда унга икки ярим йилдан кўпроқ муддатга озодликдан маҳрум қилиш жазоси тайинланган. У Владимир вилоятидаги ИК-2 қамоқхонасида жазо муддатини ўтамоқда.
Изоҳ (0)