Австралия бош прокурори ва мудофаа вазири зўрлашга оид можаролар туфайли истеъфога чиқди

Австралия бош прокурори ва мудофаа вазири зўрлашга оид бир қатор айбловлар туфайли истеъфога чиқди, деб ёзади Reuters.

Хабарга кўра, Австралия бош вазири Скотт Моррисон бош прокурор Кристиан Портер ва мудофаа вазири Линда Рейнолдсни ўз лавозимларидан четлаштирди.

Таъкидланишича, 2020 йил ёзда полицияга киритилган аноним ариза юзасидан Портер 16 ёшли қизни зўрлаганликда айбланган. Аризада айтилишича, 1988 йилда 17 ёшда бўлган Портер, ўзи билан дебатда иштирок этган 16 ёшли қизни зўрлаган. Портернинг ўзи айбловларни рад этган.

Линда Рейнолдс икки йил олдин юқори лавозимли ҳамкасби томонидан идорада зўрланганини даъво қилган ёш ходимага етарлича кўмак бермагани учун қаттиқ танқидга олинди. Ёш ходимани «ёлғончи сигир» деб атаган Рейнолдс кечирим сўрашга мажбур бўлди.

Вазирлар Маҳкамасидаги ўзгаришларга мувофиқ, Микаэлия Кеш янги бош прокурор, Питер Даттон мудофаа вазири бўлади. Ўз навбатида, Кристиан Портер саноат вазири лавозимига ўтказилади, Рейнолдс эса давлат хизматлари вазири сифатида фаолиятини давом эттиради.

Шу билан бирга Австралияда Вазирлар Маҳкамасининг аёллар тенглиги, хавфсизлиги, иқтисодий хавфсизлиги, саломатлиги ва фаровонлигини таъминлашга қаратилган янги ишчи гуруҳи тузилгани эълон қилинди.

Бош вазирнинг сўзларига кўра, мазкур ўзгартиришлар Вазирлар Маҳкамаси тарихида биринчи бор аёлларнинг энг катта ваколатга эга бўлганидан далолат беради.

«Бу нафақат идорада аёллар ўрнини кенгайтириш балки, кўникма ва тажриба, шунингдек, мамлакатимиздаги энг қийин муаммоларни ҳал қилишга ёрдам берадиган истиқбол ва ҳамкорликдир» — деди Моррисон.