Арманистон бош вазири Никол Пашинян муддатидан олдинги парламент сайловлари ўтказилиши учун ўз лавозимини апрель ойида тарк этади. Бу ҳақда у Армавир вилоятига уюштирган сафари давомида Арагац қишлоғи аҳолиси билан учрашувда айтиб ўтди, деб ёзади «РБК».
«Апрель ойида мен вазифамни тарк этиш учун эмас, балки муддатидан олдин парламент сайловлари ўтказилиши учун истеъфога чиқаман. Ушбу давр мобайнида мен бош вазир вазифасини бажарувчи сифатида фаолиятимни давом эттираман», — деди Пашинян.
Пашинян Арманистон халқига мурожаат қилар экан, сайловчилар томонидан қўллаб-қувватланган тақдирда мамлакатга аввалгидан ҳам яхшироқ хизмат қилишга ваъда берди. Агар фуқаролар унинг жамоасини қўллаб-қувватламаса, у ҳолда Пашинян ҳокимиятни топширишга сўз берди.
Арманистонда навбатдан ташқари парламент сайловлари 20 июнь куни бўлиб ўтиши кутилмоқда. Ўша вақтга қадар Пашинян ҳукумат раҳбари вазифасини бажарувчиси сифатида иш олиб боради.
Арманистон қонунларига кўра, қонун чиқарувчи ҳокимият сайловдан сўнг, янги бош вазирни сайлаши керак. Агар икки тур натижаларига кўра, Вазирлар маҳкамаси раҳбарлигига номзодларнинг ҳеч бири керакли миқдордаги овозни тўплай олмаса, у ҳолда парламент ўзини ўзи тарқатиб юборади.
Эслатиб ўтамиз, Арманистондаги сиёсий инқироз ҳамда Пашиняннинг истеъфосини талаб қилувчи норозилик намойишлари 2020 йил 10 ноябрда ҳукуматнинг Россия ва Озарбайжон раҳбарлари билан Тоғли Қорабоғдаги ҳарбий ҳаракатларни тўхтатиш тўғрисида қўшма баёнот имзолангандан сўнг бошланди. Ушбу шартномага биноан Боку Қорабоғ ҳудудининг бир қисми устидан назоратни қўлга киритди. Пашиняннинг сиёсий мухолифлари ва оппозиция тарафдорлари сулҳ шартларидан норози бўлиб, бош вазирни Озарбайжонга таслим бўлган ва ўз халқига хиёнат қилганликда айблади. Олимлар, маданият арбоблари, барча католик арманлар роҳиби Гарегин II, Арманистоннинг уч нафар собиқ президенти, шунингдек, Бош штаб қўмондонлиги Пашинянни истеъфога чиқишга чақирди.
Аввалроқ Арманистонда сентябрдан буён амал қилиб келган ҳарбий ҳолат бекор қилингани ҳақида хабар берилганди.
Мавзуга доир:
- Арманистон Бош штаби Пашиняннинг истеъфосини талаб қилди. Унинг ўзи буни ҳарбий тўнтаришга уриниш деб атади ва тарафдорларини намойишга чиқишга чақирди
- Арманистонда бош вазирга қарши намойишчилар ҳукумат биносига бостириб кирди (видео)
- Арманистон бош вазири мамлакат бошқарувнинг ярим президентлик шаклига қайтиши мумкинлигини маълум қилди
Изоҳ (0)