Марказий Осиё мамлакатларида коронавирус билан боғлиқ сўнгги янгиликлар — «Дарё» дайжестида.
Қозоғистон
Қозоғистоннинг Олмаота шаҳрида 21 мартдан буён амал қилиб келаётган карантин чекловлари узайтирилди. Шаҳар бош санитар шифокори Жандарбек Бекшин тегишли қарорни имзолади. Унга кўра, 29 мартдан 12 апрелгача шаҳарда амал қиладиган янги чекловлар диний тадбирларни тақиқлайди, хусусан, жамоавий намоз ўқиш, Рамазон ойида эса ифторлар ўтказиш мумкин эмас, шунингдек, дафн маросимлари ва бошқа маъракалар ҳам яқин оила аъзолари иштирокида бўлиб ўтиши керак. Бундан ташқари, мактаб ўқувчилари ва талабалар таълимнинг масофавий шаклига ўтказилади.Жандарбек Бекшин 26 март куни Олмаотада коронавируснинг янада юқумлироқ деб ҳисобланувчи «британча» ва «жанубий африкача» штаммларига хос бўлган мутациялар аниқланганини маълум қилди. «Янги штаммларнинг юқумлилик даражаси аввалги одатий штаммга қараганда 70 фоизга юқори… Айнан шу нарса сўнгги вақтларда шаҳарда кузатилаётган касаллик юқишининг ўсишига туртки бермоқда», — деди у.
28 март ҳолатига, бир кеча-кундузда Қозоғистонда 1492 кишида коронавирус аниқланган. Олмаотада бир кун аввалгига нисбатан (510 киши) камроқ касалланиш ҳолатлари (415 киши) аниқланган. Нур-Султонда эса 346 кишида касаллик аниқланган. Мамлакатда пандемия бошидан буён коронавирусни юқтирганлар сони 241 873 кишига етган.
Қозоғистонда 1 февралдан аҳолини коронавирусга қарши эмлаш бошланди. Мамлакат аҳолиси «Спутник V» вакцинаси билан эмланмоқда. Ҳозирда Россиянинг вакцинаси Қозоғистондаги Қарағанда фармацевтика мажмуаси томонидан ишлаб чиқарилмоқда.
Қирғизистон
Қирғизистонда эса ҳозирча чеклов чоралари киритилмайди, аммо жамоат жойларида санитария қоидалари кучайтирилади. Хусусан, фуқаролар жамоат жойларида ниқоб тақиши керак. Бу ҳақда бош вазир биринчи ўринбосари ва Республика коронавирусга қарши кураш штаби бошлиғи Артём Новиков кўрсатма берди.Унинг айтишича, бундан кейинги чоралар маҳаллий ҳукумат органлари томонидан минтақадаги эпидемиологик вазиятдан келиб чиқиб қўлланилади. Мулкчилик шаклидан қатъи назар, барча муассасаларда, ёпиқ биноларда ниқоб тақиш режимига сўзсиз риоя қилиниши керак, деди Новиков.
Қирғизистонда сўнгги кунларда коронавирусга чалиниш ҳоллари кўпаймоқда. Расмий маълумотларга қараганда, мамлакатда ҳар куни 100 га яқин ҳолат аниқланмоқда. Хусусан, 29 март ҳолатига, ўтган бир кеча-кундузда Қирғизистонда 71 кишида COVID-19 аниқланган, шулардан 53 нафари Бишкек фуқароларидир. Шу тариқа, пандемия бошидан буён коронавирусга чалинганлар сони 88 163 кишига етган.
Қайд этиш жоиз, бугун, 29 март куни Қирғизистонда аҳолини коронавирусга қарши эмлаш бошланди. Биринчи бўлиб соғлиқни сақлаш вазири Олимқодир Бейшеналиев Хитойнинг SinoPharm вакцинаси билан эмланди.Тожикистон
Тожикистонда 100 нафаргача одам иштирокида тўйлар ўтказишга рухсат берилди, аммо санитария ва эпидемияга қарши чораларга риоя қилиниши шарт. Бундай қарор Республика COVID-19 инфекциясига қарши кураш штаби томонидан мамлакатда коронавирус билан боғлиқ санитар-эпидемиологик вазиятнинг яхшиланиши сабабли қабул қилинган.
Ўтган бир йил давомида Тожикистонда тўйларда кўпи билан 30-40 кишини чақириш мумкин эди. Ўтган йилнинг апрелида эса тўй маросимларини ўтказиш вақтинчалик тўхтатилган эди. 2020 йил ёз фасли бошида эса меҳмонларнинг сонини чеклаган ҳолда, фақат яқин қариндошлар иштирокида 30-40 кишилик тўйларга рухсат берилганди.
Тожикистонда 22 мартдан аҳолини коронавирусга қарши эмлаш бошланди. Давлат раҳбарининг вакцинация бўйича имзолаган фармонига кўра, мамлакат аҳолисини эмлаш аҳолининг заиф гуруҳлари ўртасида босқичма-босқич амалга оширилади.
26 январь куни Тожикистон президенти Эмомали Раҳмон ўзининг парламентга анъанавий йиллик мурожаатида мамлакатда коронавирус устидан ғалаба қозонилганини маълум қилганди. Ўшанда 11 январдан буён мамлакатда бирорта ҳам коронавирусга чалиниш ҳолати қайд этилмагани хабар берилганди.
Ўзбекистон
Ўзбекистонда коронавирусга чалиниш бўйича 2021 йилги кунлик антирекорд кетма-кет бешинчи кун янгиланди.Ўзбекистонда коронавирусга чалингани расман тан олинганлар сони 82 536 нафарга етди. Соғлиқни сақлаш вазирлиги маълумотларига кўра, 28 март куни мамлакатнинг 10 та ҳудудида жами 196 та касалланиш ҳолати аниқланган. Бу 2021 йил ҳисобидан янги антирекорддир. Бундан аввалги энг ёмон кўрсаткич (194 та ҳолат) бир кун аввал — 27 март куни қайд этилган эди.
Аввалроқ Ўзбекистонда март ойидан бошлаб коронавирусга чалиниш ҳолатлари яна кўпая бошлагани муносабати билан бир қатор таълим муассасалари вақтинча ёпилгани ёки таълимни масофавий шаклга ўтказгани тўғрисида хабар берилганди. 1 апрелдан оммавий тадбирларни ўтказишга айрим чекловлар ўрнатилмоқда.
Ўзбекистонда аҳолини коронавирусга қарши эмлаш 1 апрелдан бошланади.
Туркманистон
Аввалроқ Туркманистоннинг Тошҳовуз вилоятида шифокор ва полициячиларни Хитой вакцинаси билан эмлаш бошлангани ҳақида хабар берилганди. Хабарга кўра, вакцинанинг партияси 6 март куни мамлакатга олиб келинган. Айнан қайси вакцинадан фойдаланилганини аниқлашнинг иложи бўлмаган, чунки препаратнинг номи хитойча ҳарфларда ёзилган.Шунингдек, хабарларга кўра, Туркманистон пойтахти Ашхободда аҳолини эмлаш 12 мартдан бошланган. Бунинг учун Туркманистонда рўйхатдан ўтказилмаган Хитой вакцинаси — Vero Cell қўлланилмоқда. Лебап вилоятида эса соғлиқни сақлаш соҳаси ходимларининг қарийб 80 фоизи коронавирусга қарши эмланган.
Изоҳ (0)