Қирғизистон соғлиқни сақлаш ва ижтимоий ривожланиш вазири Алимқодир Бейшеналиев 29 март куни мамлакатда биринчи бўлиб COVID-19’га вакцина қабул қилди. Вазир Хитойнинг SinoPharm вакцинаси билан эмланди, деб ёзади Kloop.
«Мен уколдан қўрқаман», — деган вазир эмланишидан олдин журналистларга. Шунингдек, вазир ўзидан кейин ўринбосарлари эмланиши ҳақида маълум қилган.
Қирғизистонда 29 март куни коронавирусга қарши Хитойнинг SinoPharm вакцинаси билан оммавий эмлашнинг биринчи босқичи бошланди.
Мамлакат 19 март куни COVID-19’га қарши Хитойнинг SinoPharm вакцинаси партиясини қабул қилиб олган. Умумий ҳисобда, мамлакат 150 минг доза вакцинани бепул олди. Ушбу миқдордаги вакцина 75 минг кишига етади. Ҳар бир кишига вакцина дозаси икки марта, 25—28 кун оралиғида юборилади.
Бундан ташқари, Бейшеналиев Қирғизистонга ёзнинг бошида Россиянинг 500 минг дозали «Спутник V» вакцинаси келиши кутилаётганини айтди.
Мамлакатда вакцинация уч босқичда амалга оширилиб, дастлабки босқич Бишкек, Ўш ва Чуй вилоятида бошланади.Биринчи босқичда тиббиёт ходимлари, таълим муассасалари ходимлари, ҳуқуқ-тартибот органлари ходимлари ва хавфсизлик кучларини эмлаш режалаштирилган. Иккинчи босқичда клиник хавф омилларига эга кишилар, сурункали касалликларга чалинганлар, аҳолининг ижтимоий заиф гуруҳлари, шунингдек, 60 ёшдан ошганларга вакцина берилади. Қолганлар фақат учинчи босқичда эмланади.
SinoPharm вакцинаси — фаоллаштирилмаган (ўлдирилган) вакцина. Препаратни яратишда патоген вирус ёки бактерия ёки бўлмаса уларга ниҳоятда ўхшаш микроорганизмлардан фойдаланилади, улар кимёвий реагентлар, иссиқлик ёрдамида ўлдирилади.
Соғлиқни сақлаш вазирлигининг маълумотларига кўра, SinoPharm препарати ёрдамида Хитой, БАА, Туркия, Ўзбекистон сингари 65 мамлакатда 12 миллиондан ортиқ одам эмлаган. Шунингдек, SinoPharm вакцинаси билан эмлашдан кейин ҳеч қандай иккиламчи таъсирлар қайд этилмаган.
Маълумот учун, SinoPharm вакцинаси Хитойда 2020 йил декабрь ойида рўйхатдан ўтказилди ва коронавирусга қарши қўллаш учун тасдиқланган биринчи Хитой вакцинасига айланди. Препаратнинг самарадорлиги 79 фоиз экани ҳақида хабар берилган.
Изоҳ (0)