Туркманистонда 28 март куни биринчи марта парламентнинг юқори палатаси — Халқ Маслаҳати учун сайловлар бўлиб ўтди. Бу ҳақда Туркманистон давлат ахборот агентлигига таяниб, «Хроника Туркменистана» хабар берди.
Агентликнинг хабар беришича, сайлов учун овоз бериш эрталаб соат 10:00 да бошланган, 440 нафар миллий назоратчи ( овоз беришни кузатиш, овозларни санаш ва натижаларни аниқлашнинг тўғрилигини текшириш бўйича референдум комиссияси) жараённинг қонуний кечишини кузатган.
Айни пайтда овоз бериш якунланиб, вилоятлар ва Ашхободдаги сайлов комиссиялари овозларни ҳисоблашни бошлаган. Халқ Маслаҳати палатасига 48 киши қабул қилинади.
Аввалроқ Сайлов ва референдумлар бўйича марказий комиссия 111 нафар номзодни рўйхатдан ўтказгани ҳақида хабар қилинган. Номзодларнинг 16 нафари Ашхобод шаҳар ва вилояти халқ маслаҳати (халқ кенгашлари) томонидан кўрсатилган.
Сайлов кампанияси 8—27 март кунлари бўлиб ўтди. «Хроника Туркменистана» мамлакатда сайловлар билан боғлиқ бирорта сиёсий фаоллик сезилмаганини маълум қилди.
2020 йил сентябрь ойида қабул қилинган Конституциянинг ҳозирги икки палатали парламент таркибидаги ўзгаришларни баён этган янги таҳририга биноан юқори палата 56 кишидан иборат бўлади. Маҳаллий халқ маслаҳати йиғилишларида яширин овоз бериш орқали кўрсатилган номзодлардан ташқари яна саккиз киши президент томонидан тайинланади.
Мамлакат ҳаётига бағишланган «Буюк ютуқлар хроникаси»нинг 2019 йилда чоп этилган 13-томида, Халқ Маслаҳати йиғилиши (ўша пайтда у маслаҳатчи орган эди)да икки палатали парламент яратишнинг таклиф қилиниши йилнинг асосий ҳодисаси, дея қайд этилган. 2021 йилда Туркманистонда икки палатали тизим жорий қилинди.
Маълумот учун, Туркманистон Конституциянинг 2020 йилги таҳрир қилинган матни ҳали мамлакат Адлия вазирлиги веб-сайтида эълон қилинмаган.
Изоҳ (0)