Японияда биринчи марта коронавирус инфекциясининг онадан янги туғилган чақалоққа юқиш ҳолати аниқланди. Бу ҳақда NHK телеканалига таяниб «РБК» хабар берди.
Япония педиатрия жамияти аъзолари мамлакат бўйича 1,1 минг тиббиёт муассасасидан олинган маълумотларни текширди. Улар 2020 йилнинг август ойи охирига қадар Японияда COVID-19 юқтирган оналардан 52 нафар чақалоқ дунёга келганини кўрсатди.
Янги туғилган чақалоқлардан бирида коронавирусга топширган тести ижобий натижа берди, лекин телеканалнинг хабар беришича, унинг соғлиғига ҳеч нарса хавф солмаяпти.
Бу каби бир нечта ҳолатлар бошқа мамлакатларда ҳам аниқланган. Шунингдек, мутахассислар гуруҳи раҳбари, профессор Мориоко Ичиронинг таъкидлашича, бундай ҳолат камдан кам содир бўлади, вирус юқтирган чақалоқларда эса енгил аломатлар пайдо бўлмоқда. Мутахассис ҳомиладор аёлларни вирусга қарши етарлича чораларни кўришга чақирди.
2020 йилнинг ноябрь ойида Сингапурда ҳомиладорлик даврида коронавирус билан касалланган аёл қонида вирусга қарши антитаналари бўлган чақалоқни дунёга келтирди. Онанинг сўзларига кўра, шифокорлар унга ўзининг антитаналари йўқолганини айтган, шифокорлар антитаналарнинг онадан болага ўтганини тахмин қилмоқда.
Россиянинг «Спутник V» вакцинасини ишлаб чиққан Гамалея номидаги марказ директори Александр Гинцбург эмизиш пайтида антитаналарнинг онадан янги туғилган чақалоққа ўтиш эҳтимоли бор, деб ҳисоблайди.
Аввалроқ АҚШда қонида коронавирусдан ҳимояловчи антитана мавжуд бўлган чақалоқ дунёга келгани ҳақида хабар берилганди. Флорида штатининг Бока-Ратон шаҳри педиатрлари Пол Гильберт ва Чед Рудникнинг айтишича, боланинг онаси, тиббиёт ходими бўлган аёл январь ойида ҳомиладорликнинг 36-ҳафтасида Moderna вакцинаси билан эмланган. Уч ҳафта ўтиб эса аёл тетик ва соғлом қизалоқни дунёга келтирган.
Шунингдек, Австриядаги Инсбрук тиббиёт университети олимлари коронавирусга чалиниб чиққанларда касалликка қарши иммунитет камида саккиз ой давомида сақланиб қолишини аниқлаган эди.
Изоҳ (0)