Yaponiya olimlari koronavirusning onadan go‘dakka yuqishi bilan bog‘liq birinchi holatni ma’lum qildi

Yaponiyada birinchi marta koronavirus infeksiyasining onadan yangi tug‘ilgan chaqaloqqa yuqish holati aniqlandi. Bu haqda NHK telekanaliga tayanib “RBK” xabar berdi.

Yaponiya pediatriya jamiyati a’zolari mamlakat bo‘yicha 1,1 ming tibbiyot muassasasidan olingan ma’lumotlarni tekshirdi. Ular 2020-yilning avgust oyi oxiriga qadar Yaponiyada COVID-19 yuqtirgan onalardan 52 nafar chaqaloq dunyoga kelganini ko‘rsatdi.

Yangi tug‘ilgan chaqaloqlardan birida koronavirusga topshirgan testi ijobiy natija berdi, lekin telekanalning xabar berishicha, uning sog‘lig‘iga hech narsa xavf solmayapti.

Bu kabi bir nechta holatlar boshqa mamlakatlarda ham aniqlangan. Shuningdek, mutaxassislar guruhi rahbari, professor Morioko Ichironing ta’kidlashicha, bunday holat kamdan kam sodir bo‘ladi, virus yuqtirgan chaqaloqlarda esa yengil alomatlar paydo bo‘lmoqda. Mutaxassis homilador ayollarni virusga qarshi yetarlicha choralarni ko‘rishga chaqirdi.

2020-yilning noyabr oyida Singapurda homiladorlik davrida koronavirus bilan kasallangan ayol qonida virusga qarshi antitanalari bo‘lgan chaqaloqni dunyoga keltirdi. Onaning so‘zlariga ko‘ra, shifokorlar unga o‘zining antitanalari yo‘qolganini aytgan, shifokorlar antitanalarning onadan bolaga o‘tganini taxmin qilmoqda.

Rossiyaning “Sputnik V” vaksinasini ishlab chiqqan Gamaleya nomidagi markaz direktori Aleksandr Ginsburg emizish paytida antitanalarning onadan yangi tug‘ilgan chaqaloqqa o‘tish ehtimoli bor, deb hisoblaydi.

Avvalroq AQShda qonida koronavirusdan himoyalovchi antitana mavjud bo‘lgan chaqaloq dunyoga kelgani haqida xabar berilgandi. Florida shtatining Boka-Raton shahri pediatrlari Pol Gilbert va Ched Rudnikning aytishicha, bolaning onasi, tibbiyot xodimi bo‘lgan ayol yanvar oyida homiladorlikning 36-haftasida Moderna vaksinasi bilan emlangan. Uch hafta o‘tib esa ayol tetik va sog‘lom qizaloqni dunyoga keltirgan.

Shuningdek, Avstriyadagi Insbruk tibbiyot universiteti olimlari koronavirusga chalinib chiqqanlarda kasallikka qarshi immunitet kamida sakkiz oy davomida saqlanib qolishini aniqlagan edi.