SARS-CoV-2 коронавирусининг одамлар орасида пайдо бўлиши ва тарқалишига сабаб Ухань шаҳридаги ёввойи ҳайвонларнинг савдоси бўлиши мумкин. Бу ҳақда олимлар, шу жумладан, Жаҳон соғлиқни сақлаш ташкилоти (ЖССТ)нинг Хитойдаги текширувида иштирок этган мутахассисларнинг Bloomberg’га берган баёнотига асосланиб, «РБК» хабар берди.
Тахминларга кўра, бозорда сотилган ҳайвонлардан бири вирусни кўршапалакдан одамга юқтирган оралиқ ташувчига айланган.
Хабарга кўра, ЖССТ томонидан январь–февраль ойларида Хитойда ўтказилган текширув натижалари шу ҳафта эълон қилиниши режалаштирилган. Бироқ бу натижалар якуний бўлиб қолмайди, мутахассислар коронавируснинг тарқалиш йўлларини аниқлаш учун Хитой ташқарисида ҳам қўшимча текширувлар ўтказади.
Текширув жараёнида вирусни одамларга юқтиришнинг иккита асосий манбаси аниқланган — коронавирус инсон популяциясига кирмасдан олдин вирусни ташиб юрган кўршапалаклар ва Хитой бозорида тез-тез сотиладиган майда йиртқич сутемизувчи сиветалар.
Тахминларга кўра, кўршапалаклар орқали Ухань шаҳридаги сиветаларга вирус юққан, натижада улар оралиқ ташувчига айланган ва улар орқали SARS-CoV-2 одамларга ўтган.
Bloomberg’нинг таъкидлашича, шу билан бирга, ушбу тахминлар ҳақидаги саволлар ҳанузгача очиқ қолмоқда, чунки Ухань бозорида вирусни юқтирган ҳайвонлар аниқланмаган ва касалликка чалиниш бўйича дастлабки ҳолатлар COVID-19’ни бозорда юқтириш ҳолатларидан олдинроқ қайд этилган.
АҚШлик тадқиқотчи Жоэл Вертхайм томонидан илгари сурилган фаразга кўра, вирус ҳайвонлардан одамга бир неча марта юққан бўлиши мумкин. Вирусга чалиниш бўйича дастлабки ҳолатларда инфекция занжири ўша нуқтада узилган, аммо Ухань бозорида коронавирус мутацияга учраган ва одамдан одамга юққан.
Хитойга ташриф буюрган экспертлар гуруҳи таркибида бўлган австралиялик микробиолог Доминик Дуаернинг айтишича, мутахассислар Ухань бозорига Хитойнинг жануби-шарқидаги фермер хўжаликларида боқилган ёввойи ҳайвонлар, шу жумладан, сиветалар келтирилган бўлиши мумкинлигини тасдиқлаган. Хитойнинг ушбу қисмидаги кўршапалакларда 2013 йил бошида SARS-CoV-2’га ўхшаш вирус аниқланган эди..
Шунингдек, чумолихўрлар туркумига яқин сутемизувчи — панголинлар одамларга коронавирус юқтиришда «гумон қилинаётганлар» қаторига киритилган эди. Худди кўршапалаклар сингари улар ҳам Хитойда истеъмол қилинади. Баъзи олимлар айнан танасида вирус бўлган панголинлар Ухань шаҳридаги қишлоқ хўжалиги бозорига келтирилган ва хитойликлар томонидан истеъмол қилинган бўлиши мумкин, деб тахмин қилган эди.
Аввалроқ ЖССТ томонидан пандемия бошида Уханда коронавируснинг 10 дан ортиқ мутацияси бўлгани, Ухань шаҳрида COVID-19 келиб чиқишига оид муҳим далиллар топилгани, Хитой ҳукумати COVID-19’га чалиниш бўйича илк ҳолатлар ҳақидаги маълумотларни беришдан бош тортгани ҳақида хабар берилганди
Изоҳ (0)