Австралияда сув тошқини туфайли қарийб 20 минг аҳоли эвакуация қилинди (видео)

Австралиянинг шарқий қирғоқлари бўйлаб ёғаётган ёмғир туфайли бир қатор ҳудудларда сўнгги 60 йил ичидаги энг йирик сув тошқинлари юз берди. Бу ҳақда Австралиянинг Янги Жанубий Уэльс штати бош вазири Гледис Бережиклянга таяниб, «Интерфакс» хабар берди.

Хабарга кўра, қирғоқдаги хавфли пасттекисликлардан аллақачон 18 мингга яқин одам эвакуация қилинган. Синоптиклар ёмғир 24 март, чоршанба кунигача давом этишини истисно қилмагани сабабли эвакуация қилинганлар сони яна минглаб кишига ортиши мумкин.

Бережикляннинг айтишича, аҳолиси энг кўп штат ҳисобланувчи Янги Жанубий Уэльсда вазият кутилганидан ёмонроқ бўлиб чиққан.

«Мид-Норт қирғоқбўйи минтақасидаги шаҳарлардан 15 мингга яқин одам, Непин ва Хоксбери дарёларидан кўтарилган тошқинларига учраган ғарбий Сиднейдан эса яна 3000 киши эвакуация қилинди», —  деди у.

«Мен мамлакат тарихида бундай тезкор кетма-кетликда, бу қадар кескин об-ҳаво шароити кузатилган бирортаям ҳолатни билмайман», — деди Бережиклян ва «олдинда жуда қийин ҳафта кутиб турганини» таъкидлаб ўтди. Расмийнинг сўзларига кўра, штатнинг ғарбий минтақаларидаги баъзи жойларда 1961 йилдан бери илк бор энг ёмон тошқин кузатилган.

There are major floods at the fringe of Sydney, Australia

NSW's Premier just warned parts of the state were experiencing a "one in 100-year event"

How many "one in 100-year events" do we need each year for Australia to free itself from the clutches of coal, oil & gas?#climate pic.twitter.com/3JYPBCrjok

— Assaad Razzouk (@AssaadRazzouk) March 21, 2021

Видеолавҳалар ва ижтимоий тармоқлардаги кадрлар шуни кўрсатадики, тез ҳаракатланаётган сув уйларни, йўлларни бузиб, дарахтларни оқизиб кетган ва йўл инфратузилмасига зарар етказган. Фавқулодда хизматлар зарар кўрган уйларнинг умумий сонини «юзлаб» дея тахмин қилмоқда. Штат бўйлаб бир нечта йирик йўллар ёпилган ва аксарият мактабларда дарслар бекор қилинган.

ОАВ хабарига кўра, об-ҳавонинг кескин ўзгариши Австралия ҳукуматининг COVID-19 вакциналарини Янги Жанубий Уэльс бўйлаб тарқатишига салбий таъсир қилган. Табиий офат туфайли бузилган режаларга кўра, келгуси бир неча ҳафта ичида мамлакатнинг 6 миллионга яқин аҳолисига вакцинанинг биринчи дозаси етказиб берилиши керак эди.