Буюк Британия қироличаси Елизавета II’нинг расмий қароргоҳи бўлган Букингем саройи қироллик оиласи аъзолари турар жойларининг барчасидаги хилма-хиллик ва инклюзия сиёсатини қайта кўриб чиқади. Бу ҳақда Британия ОАВ манбаларига таяниб, Meduza хабар берди.
«Бизда хилма-хилликни қўллаб-қувватлаш учун процедуралар ва дастурлар мавжуд, аммо ҳали кўзланган ютуққа эришганимиз йўқ, шунинг учун яна кўп ишлар қилиниши кераклиги тўғрисида келишиб олдик», — дейилади саройнинг Daily Mail нашрига берган баёнотида.
Қайд этилишича, хилма-хилликни қўллаб-қувватлаш бўйича мавжуд амалиётни баҳолаш шаҳзода Гарри ва унинг рафиқаси Меган Маркл Буюк Британия қироллик оиласини ирқчиликда айблаганидан олдинроқ бошланган, аммо уларнинг интервьюсидан сўнг «янги туртки» олган.
Баҳолаш доирасида Букингем саройи этник озчиликлар вакиллари ва ногиронлар жамоаси билан маслаҳатлашади. Сарой, шунингдек, хилма-хиллик учун раҳбар тайинлаш имкониятини кўриб чиқмоқда.
«Кўплаб тадбирлар кўриб чиқилмоқда. Албатта, кимдадир бу ҳаракат етакчилигини ўз зиммасига олиш ва хилма-хилликни қўллаб-қувватлаш ғояси бўлса, эътиборга оламиз. Аммо аниқ режалар ҳақида эълон қилишга ҳали эрта. Биз ушбу тоифа вакилларини тинглаймиз ва тўғри тушунишни ўрганамиз», — дейилади саройнинг CNN’га берган баёнотида.
Эслатиб ўтамиз, март бошида Британия шаҳзодаси Гарри ва унинг рафиқаси Меган Маркл америкалик машҳур телебошловчи Опра Уинфрига берган интервьюси эълон қилинганди. Маркл интервьюда қироллик оиласининг айрим аъзолари унинг биринчи фарзанди туғилмасдан аввал боланинг териси рангидан ташвишлангани ва Меган руҳий тушкунликка тушган пайтда мутахассисларга мурожаат қилишига йўл қўймаганини айтган (гўёки бу қироллик обрўсига путур етказади). 2020 йилда қироллик унвонлари ва мажбуриятларидан омма олдида воз кечиб, АҚШга кўчиб ўтган жуфтлик интервью мобайнида бир қатор эътиборга молик баёнот ва бошқа масалалар қаторида Британия монархиясининг парда ортидаги ҳаётидан баъзи сирларни очиб берди.
Шаҳзода Гарри ва рафиқаси Марклнинг интервьюсидан кейин шов-шув кўтарилиб, айни кунларда бутун дунёда муҳокама қилинмоқда. Аввал Британия қироллик оиласи Меган Марклнинг ирқчилик масаласи ҳақидаги баёнотини ўрганиб чиқишга ваъда берганди. Елизавета II эса набирасининг интервьюсига баҳо бериш учун бироз вақт кераклигини айтган.
Изоҳ (0)