Россия президенти Владимир Путин 2021 йил 23 март куни коронавирусга қарши вакцина билан эмланишини маълум қилди. Путин айнан қайси турдаги препарат билан вакцинация қилинишга аниқлик киритмаган. Унинг сўзларига кўра, мамлакатда вакцинациянинг бориш суръатини тезлаштириш лозим, бу пандемия туфайли жорий қилинган чекловларнинг юмшатилиши ва босқичма-босқич бекор қилинишига сабаб бўлади, деб ёзмоқда «Коммерсантъ».
«Вакцинация — бу ҳар бир фуқаронинг ихтиёрий хоҳиши ва шахсий фикрига боғлиқ жараён. Умуман олганда, ўзим ҳам эртага коронавирусга қарши эмланмоқчиман»,— деган Путин вакциналар ишлаб чиқариш ва аҳолини эмлаш ишларига бағишлаб ўтказилган йиғилишда.
Путин қайси вакцина билан эмланиши борасида аниқ фикр айтмаган. Бироқ Россияда ишлаб чиқарилган вакциналарнинг одамлар саломатлиги учун хавфсиз эканлигига урғу берган.
«Хорижнинг ҳеч бир препарати вирусдан ҳимоялаш борасида бу каби юқори даражадаги самарадорлик намойиш қилмаган»,— дейди Путин.
Россия президентининг матбуот котиби Дмитрий Песков Путиннинг маҳаллий вакциналардан бири билан эмланишини хабар қилган.
Путин вакцинация ишларини жадаллаштириш, эмлаш препаратлари ҳамма учун қулай ва очиқ бўлиши кераклигини таъкидлаган. Унинг айтишича, коронавирус чекловларини бекор қилиш масалалари мазкур ҳаракатларга бевосита боғлиқ.
«Россияда вакцинациянинг дастлабки босқичида 6,3 миллион одам эмланган, шундан 4,3 миллион фуқаро тўлиқ вакцинация қилинган, яъни препаратнинг биринчи ва иккинчи дозаларини қабул қилиб олган»,— деган Путин йиғилишда.
Йиғилишда Россияда аҳолининг 4,4 фоизи коронавирусга қарши эмлангани қайд этилган. АҚШда 73,6 миллион аҳоли COVID-19’га қарши вакцинация қилинган ва бу мамлакат умумий аҳолисининг 22 фоизини ташкил қилади.
Россияда коронавирусга қарши 3 та вакцина рўйхатдан ўтказилган: «Гамалея» марказининг «Спутник V», Новосибирскнинг «Вектор» маркази томонидан ишлаб чиқилган «ЭпиВакКорона» ва Чумаков номидаги марказ ишлаб чиққан «КовиВак». Россияда аҳолини COVID-19’га қарши эмлаш ишлари 2020 йил декабрь ойида бошланган. 2021 йил январь ойи ўрталарида оммавий вакцинацияга старт берилган.
Аввал март бошида давлат раҳбарларидан Украина президенти Владимир Зеленский коронавирусга қарши эмлангани, Ҳиндистон бош вазири Нарендра Моди коронавирусга қарши мамлакатда ишлаб чиқарилган COVAXIN вакцинасининг биринчи дозасини олгани, шунингдек, Дунёнинг энг бадавлат кишиларидан бири, Berkshire Hathaway бош директори Уоррен Баффет Pfizer/BioNTech компаниясининг вакцинаси билан коронавирусга қарши эмлангани ҳақида хабарлар берилган.
Февраль ойида Туркия президенти Ражаб Тоййиб Эрдўғон унга коронавирусга қарши вакцинанинг иккинчи дозаси юборилганини маълум қилган, у вакцинанинг биринчи дозасини 14 январда қабул қилиб олганди.
Бундан аввал Шаҳзода Чарльз ва унинг рафиқаси, БМТ бош котиби, миллиардер Билл Гейтс ҳамда Аргентина президенти коронавирус вакцинаси билан эмланган.
Изоҳ (0)